Шокшым пуаш тӱҥалме тургымлан шуко пачеран пӧрт-влак чыла гаяк, социал кӱлешан чыла 848 объект, 523 котельный ямде улыт. Шокшым, вӱдым пуышо да канализций сетьым 100 процентлан ямдылен шуктымо.
Тидын нерген Марий Эл вуйлатыше Юрий Зайцевлан республикын чоҥымаш, архитектур да илымвер-коммунал озанлык министр Александр Горбунов 2026-2027 ийысе шыже-теле жапыште республикысе илыш йӧным ыштыше да социал сфер объект-влакым ямдылымылан пӧлеклалтше каҥашымаште каласен. Регион вуйлатыше ямдылалтме пашам жапыштыже ыштен шуктымын кӱлешан улмыжым палемден.
«Объектын ямде улмо паспортшо лӱмжылан огыл ышталтшаш. Тиде туткар деч утлаш полшышо кӱлешан пашам эртарыме нерген документ», – поснак палемден Юрий Зайцев.
Александр Горбуновын увертарымыж почеш, ямдылалтмаш паша пеҥгыдемдыме график-план почеш эрта. Тудо мучашке лишемеш, чыла тӱҥ объект-влак шокшым налаш ямде улыт.
Туткар лиешак гын, тудым кораҥдаш республикыште 171 бригадым чумырымо, республикысе Минстрой ден ЖКХ-ште мо кӱлешым шапашлыме.
Йошкар-Олаште шуко пачеран пӧртлашке шокшо октябрь тӱҥалтыште толшаш.
Марий Эл вуйлатышын пресс-службыжын уверже негызеш Геннадий САБАНЦЕВ ямдылен..
