Марий Элыште пудий шукертак помыжалтын да вольык ден айдеме ӱмбак чот шужышыла кержалташ тӱҥалын. Теве эртыше арнян гына, 24-30 апрель жапыште, республикыштына пудий пурымо 95 случайым регистрироватлыме, тыгодым тазалыклан кугу лӱдыкшым ыштен кертше копшаҥгым 14 ияш марте ийготан 33 йочан капкылже гыч лукмо.
А сезон тӱҥалме деч вара медицине организацийыш 167 еҥ, ты шотыштак 14 ияш марте ийготан 49 икшыве, полышым йодын миен. Ӱмаште тыгаяк жаплан пудий пурымо 41 случайым регистрироватлыме, ончылий – 67.
Капкылым пурлшо пудийым Марий Элын Гигиене да эпидемиологий рӱдерыштыже тергат. Лабораторий каныш да пайрем кечылаштат пашам ышта.
Тений энцефалитан пудийым эше мумо огыл. Тиде вирус деч вакцинаций полшымо дене аралалташ лиеш. 2 май марте республикыштына тыгай прививкым 936 еҥ ыштыктен.
М.ИВАНОВА
