Йошкар-Олаште «Финнн-угор калык-влакын поянлыкышт» Х тӱнямбал финн-угор студент форум эртен.
Тудо ты кечынак почмо Калык-влакын келшымаш пӧртыштышт эртарыме икымше мероприятий лийын. Форум финн-угор университет-влакын ассоциацийышкышт пурышо, тыгак Юл кундемысе вуз, общий да кыдалаш профессиональный образований организаций, калык тӱвыра рӱдер-влакын делегацийыштым чумырен. Погынышо-влакым Марий Эл вуйлатыше Юрий Зайцев саламлен.
Ушештарыман, ты форум 10 ий жапыште 2 тӱжем наре самырык еҥым ушен. Российын 30 наре регионжо да 10 наре йот эл гыч участник-влак лийыныт.
«Тендан тӱвырам, йылмым вияҥдаш, ик кундемыште шочын-кушшо калыкым чумыраш кумылда уло. Марий Эл таче финн-угор тӱвыран рӱдышкыжӧ савырнен. Ме тендам уло кумылын марий мландыште, Калык-влакын келшымаш пӧртыштышт, вашлийына. Тек келшымаш тендам уша, вет лач тидлан ты форум эртаралтеш», – каласен регион вуйлатыше.
Форум почмо дене Федераций Совет председательын алмаштышыже Константин Косачеват саламлен. Тудо ты мероприятийын ончыкыжымат тӱрлӧ калык тӱвыра кокласе кылым саемдаш полшымыжлан ӱшаным ыштен.
Х тӱнямбал финн-угор студент форум университет-влак коклаште научно- образовательный вашкылым пеҥгыдемдаш полшышаш, студент-влакын шанче, творческий, мер пашаште чолгарак лияш кумылаҥдышаш. Форум кышкарыште тӱрлӧ направлений дене секций ден площадке-влак пашам ыштат.
Марий Эл вуйлатышын Информационный паша шотышто пӧлкажын уверже негызеш С.Носова ямдылен.
