Марий Эл Республик вуйлатышын Республик кӧргыштӧ да ӧрдыж гыч толын коштмо шотышто грантшылан конкурс иктешлалтын.
Эксперт комиссийыш чылаже кум номинаций дене 15 йодмаш пурен. «Событий дене кылдалтше мероприятий кышкарыште деловой мероприятий» номинцийыште Марий кугыжаныш университетын темлыме «Туризм. Спорт. Илыш» тӱнямбал форум» проектше сеҥышыш лектын. Тудын почеш университет регион-влак кокласе кӱкшытан «Еш спорт турмарафон» онлайн-конкурсым эртара. «Туризм. Спорт. Илыш» тӱнямбал кӱкшытан форум кум кече шуйна да кум направленийым авалта: образовательный, просветительский да презентационный. Россий деч посна участник-влак Казахстан, Индий да Беларусий гыч лийыт.
«Муниципал образованийын толын коштмо тӱшкаже» номинацийыште Козьмодемьянскысе тӱвыра да историй тоштер-комплексын «Козьмодемьянскыш Юл эҥер велым пассажир причал кумдык гоч толшо тӱшкам ыштымаш» проектше сеҥышыш лектын.
«Марий Эл Республикыште 2024 ийыште Еш идалыкым эртарыме дене кылдалтше еш дене канаш турист продукт» номинаций Шернур централизоватлыме клуб системын «Марий Йӱштӧ Кугызан резиденцийыштыже интерактивный еш программе» темлыме проектлан окса полышым налаш йӧным почын. Сеҥышыш лекше кажне проектым илышыш шыҥдараш 500 тӱжем теҥге окса полыш лиеш.
Тыгак Марий Элыште турист маршрутлаште инфраструктурым вияҥдаш субсидийым ойыраш конкурс иктешлалтын. Ныл проектым тидлан ойырен налыныт. Нунын коклаште иктыже – «Тантрум» ООО, «Санитарный модульым ыштымаш да вераҥдымаш» номинацийыште сеҥен. Изи Кашан эҥер серыште «Тантрум» вей парк кумдыкышто калыклан канаш условийым саемдаш тӱҥалеш. Вес сеҥыше – предприниматель Эва Искакова, Йошкар-Оласе кӱртньыгорно вокзал пеленысе кумдыкышто Турист увер рӱдерым ышташ шийвундо полышым налеш.
«Турист ресурсым ыштымаш да тӱзатымаш» номинацийыште кок сеҥышым палемденыт: «Формула успеха» ден «Простая еда» ООО-влак. Икымше организацийжын пашажым «Теплая речка» трактир виктара. Субсидий кӱшеш трактир пелен кеҥежымсе оралтым ыштат. Вара тушто коман мелнам ышташ туныктымо мастер-класс-влакым эртараш тӱҥалыт. А «Простая еда» кафен озаже-влак Изи Какшан эҥер серыште кок верандым ышташ палемденыт. Кажне сеҥышылан ойыралтше субсидийын кугытшо – 2 миллион теҥге.
С.Носова
Снимкыште: Элнет эерыште — турист-влак.
Авторын фотожо
