«МАРИЙ ЭЛ» ТАЧЕ

Йӧратыме олалан «лудым» пӧлеклен

 Йошкар-Оласе Брюгге  эҥерӱмбалне, Гоголевский кӱвар деч тораште огыл, пеш изи у скульптурым вераҥденыт. Паледа мом: 6 килограмм нелытан лудым!  Тудо «Сур изи шӱй» («Серая шейка») маналтеш.

Тыгай пӧлекым шке йоратыме олажлан вате-марий мужыр Марина ден Владимир Ельцовмыт ыштеныт. Скульптурын  кӱкшытшӧ 17 сантиметрыш,  кужытшо 28 сантиметрыш шуэш.

Скульптурым ышташ шонымаш ончыч Маринан ушышкыжо толын. Варажым пелашыже тудым илышыш шыҥдараш манын, Урал ден Сибирьысе предприяийлаш лектын. Но ак шотышто мутланен келшен огытыл. Сандене тудо Российысе сӱретче-влак ушемын Марий пӧлкажым вуйлатыше Анна Санникова деч специалистым муаш полышым йодын. Сӱретче Иван Станковым темлен. Лудыжым ювелир шыште гыч велыме. Ты пашажым шукташ Марий машиностроитель заводын директоржо Борис Ефремов полшен. Кеч  шыште дене заводышто пашам ыштыме опытышт лийын огыл гынат, шындыме задачым сай профессионал семын шуктеныт.

Владимир шкеже ты скульптур марий рӱдоланан «изюминкышкыже» савырна манын ӱшана. Ойлымыж почеш, эҥер сер дене эртыше кажне еҥ пиалан лияш манын лудылан ший оксамат кудалтен кертеш.

Мутат уке, олашке толшо турист-шамычынат тудым ончал каяш кумылышт лекшаш. Ты изи скульптур мемнан олалан чынжымак келшен толшаш. Молан манаш гын  Изи Какшан энерыште шошо, кеҥеж, шыже пагытыште шуко кайыклудо ила. Нуно эсогыл серыште шогышо еҥ-влак деке пеш лишке ийын толыт, огытат лӱд. Телым гын, Пӱнчер ото кумдыкысо  плотинаште пеш шукын илат. Нуным ончалаш еҥ-влак тушко лумын коштыт.  Эшежым лудо марий калыкнан шнуй кайыквусыжлан шотлалтеш.

Марий рӱдолалан тыгай ойыртемалтше пӧлекым ыштыше еҥже денат палдарыман, очыни. Тудо Марий машиностроитель заводын дочерний предприятийжым, «Маяк» ООО-м вуйлата.  Российысе ӱстембал теннис ветеран-влакын ассоциацийыштын икымше вице-президентше, ты спортын  видше дене ветеран-влак кокласе тӱнямбал модмашын кок гана чемпионжо. Шкежат всероссийский, зональный, республиканский таҥасымаш-влакым эртара.

С.Носова

Фотом Йошкар-Оласе администрацийын соцкылысе лаштыкше гыч налме.

 

Опубликовать в Одноклассники

Добавить комментарий