Марий Элыште илыше-влакым «Российын лидерже-влак» всероссийский конкурсыш ушнаш ӱжыт.
Тиде конкурс тений 4 апрельыште тӱҥалын. Тудо Россий Федераций президентын темлымыж почеш 2017 ий годсек эртаралтеш.
– Конкурс республикыште да пӱтынь эл мучко шке дене палдараш йӧным пуа. Ныл гана эртымыж жапыште мемнан республик гыч 2101 еҥ ушнен. Нунын коклаште ныл финалист ден ик сеҥыше лийыныт. У сезонышто региональный этап ешаралтын. Тудын дене келшышын участник-шамыч республик вуйлатыше деч управленческий задачым решатлаш тӱҥалыт. Тудым иктешлымеке, сеҥыше команде-влак дене вашлиймаш лиеш. Конкурсыш ушныза, шке шинчымашдам да моштымашдам вияҥдыза. Шке ончылныда кугу цельым шындыза, – темлен Юрий Зайцев республикыште илыше-влаклан.
Конкурсыш Российыште да йот эллаште илыше 55 ияш марте ийготан 2 ий да тылеч шукырак жап вуйлатыме пашам шуктышо еҥ-влак ушнен кертыт. Тидлан 14 май марте лидерыроссии.рф сайтыште регистрацийым эртыман.
Юбилей сезонышто икымше гана анкетым возымо деч вара кажне участник вуйлатыме койыш-шоктышым вияҥдыме, икмыняр моло шотышто темлымашым налын кертеш.
Конкурсышто сеҥымылан тӱҥ приз-влак кокла гыч теве мо палемдалтын: тунемаш 1 миллион теҥге грант, тыгак Российысе вӱдышӧ управленец-влак кокла гыч наставник дене вашлиймаш да карьер шотышто консультацийым темлымаш.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
