Марий Эл «Шинчымашет дене пайлалт» Россий кӱкшытан просветитель акцийыш ушнен.
«Знание» Россий обществын мероприятийже элыштына визымше гана стартым налын. Тений тудо 2-30 сентябрьыште эрта.
Марий Элыштына лектор Марий Эл правительстве председательын икымше алмаштышыже Евгений Кузьмин, Сбербанкын пӧлкажым вуйлатыше Максим Бакутов да Марий кугыжаныш университетын ректоржо, «Знание» Россий обществын председательже Михаил Швецов лийыныт.
«Мемнан регионышто ты проектын угыч стартым налмыже куандара. Тиде самырык профессионал-влаклан кугу аудиторий ончылно лектор, спикер семын выступатлаш да шке землякше-шамычын просвещений пашашкышт надырым пышташ да шинчымашым ончыкташ йӧн. Кажне гана «Знание» Россий обществе науко, технологий, искусство да моло сферыште сеҥымаш дене палдарыше сай площадкым ышта. Тыгай акцийлан кӧра федерал кӱкшытыштӧ веле огыл, регионысо талантан лектор ден икгай шонымашан еҥ-влакын тӱшкашт кугемеш, а колыштшо-влаклан уш-акылым пойдараш йӧн лиеш», – палемден Евгений Кузьмин.
Марий кугыжаныш университетын педагогический специальность дене кугурак курслаште тунемше студент-влак дене вашмутланымаште тудо Российын у регионжо-влаклан полыш нерген каласкален.
Михаил Швецов МарГУ-што туныктымо специальность-влак, вузын историйже да тудын тӱҥ шонымашыже, йӱлаже, проектше, миссийже дене палдарен. «Знание» Россий обществын миссийже – чын фактым каласкалаш, кызытсе шинчымашым пуаш да тӱрлӧ сферыште сеҥымаш дене палдараш», – каласен тудо.
Акцийыш ушнаш кумыл уло гын, проектын сайтышкыже пурыман да регистрироватлалтман.
Г.Кожевникова
