«Сенеж» виктемын мастерскойыштыжо «Лидер качествым вияҥдымаш. Коммуникативный практике» программын нылымше образовательный модульжо мучашлалтын.
Тушто Марий Эл Кугыжаныш Погын председательын алмаштышыже, специальный военный операцийын ветеранже, «Герои Марий Эл. Талешке-влак» регионысо кадр прграммын участникше Александр Смирнов лийын.
Модульын кышкарыштыже программын участникше-шамыч Россий Федераций законодательный кучемын негызше, сайлыме кампанийын права велым чаракше, киберсоциализаций да командын результатше верч лидерын персональный ответственностьшо дене кылдалтше йодыш-влакым лончылаш, пӱртӱслӧ огыл уш-акылым практикыште кучылташ, элите-шамыч кокласе конфликтым шӧраш да шуко молан тунемыныт.
Программыште поснак кугу тӱткышым практический занятий-влаклан ойыреныт. Участник-влаклан «ТУЙ дене вашмутланымаш» тренингым да герменевтике дене мастер-классым эртареныт.
Площадкылаште модератор да спикер семын кугыжаныш виктем, политтехнологий, пӱртӱслӧ огыл уш-акыл алан гыч вӱдышӧ эксперт ден специалист-шамыч пашам ыштеныт. Нунын коклаште Россий президентын администрацийже, правительствын аппаратше, Президент академий пеленысе Кугыжаныш виктемын кӱшыл школжо гыч представитель-влак да шуко моло лийыныт.
«Тунемме программе ты ганат пеш поян лийын. Тыште погымо шинчымаш ончыкыжым законым ямдылен лукмо пашаште да шочмо республикыштына общественный проект-влакым илышыш пуртымаште кӱлеш лиеш шонем», – «Сенеж» виктемын мастерскойжо гыч пӧртылмекыже палемден Александр Смирнов.
Маргарита Иванова ямдылен.
Марий Эл Кугыжаныш Погынын пресс-службыжын фотожо.
