Кугыжаныш Погынын председательже Михаил Васютин сарын ветеранже, Йошкар-Олан почётан гражданинже Валентина Федоровам шушаш Сеҥымаш кече дене саламлен.
Валентина Павловна 1923 ийыште пошкудо Татарстан Республикыште шочын. Сар деч ончыч школышто тунемын да ургымо производствышто пашам ыштен.
1942 ий февральыште санинструкторлан тунем лекше ӱдырым фронтыш налыныт. Валентина Федорова шапаш полкын 382-шо санитарный ротыштыжо служитлен, Сеҥымаш кечым Мӱндыр Эрвелне вашлийын, туштак Японий ваштареш кредалын. Мӧҥгыжӧ 1945 ий ноябрьыште гына пӧртылын.
Сар деч вара Астана оласе ик йочасадыште 20 ий наре воспитательлан ыштен. Вара Екатеринбургыш куснен, тушечын – Йошкар-Олашке. Тыште тудо ӱдыржӧ да веҥыж дене пырля ила.
Валентина Федоровам сар жапысе боевой заслугыжлан Отечественный сарын II степенян орденже, Жуков медаль, «За боевые заслуги», «За взятие Будапешта», «За взятие Вены», «За освобождение Белграда», «За победу над Германией в Великой Отечественной войне 1941-1945 гг.» медаль-влак да моло награде дене палемденыт. 2025 ийыште ветеранлан «Йошкар-Олан почётан гражданинже» лӱмым пуэныт.
Вашлиймаште марий парламентым вуйлатыше Михаил Васютин ветеранлан лӱддымылыкым ончыктымыжлан да Кугу Сеҥымашым лишемдымашке надырым пыштымыжлан тауштен, пеледыш аршаш ден шарнымашан пӧлекым кучыктен.
Маргарита ИВАНОВА.
Марий Эл Кугыжаныш Погынын пресс-службыжын фотожо.
