Семёновка врачебный амбулаторийын педиатрже Рита Тойшева Казаньыште эртыше «Врач-педиатрын практикыштыже кызыт лекше йодыш-влак» науко-практике конференцийыште лийын.
Регион-влак кокласе кӱкшытан мероприятийын кышкарышкыже 17 йодышым пуртеныт. Лекций-влак чызым кочшо ньоган шортмо амалже, йоча анемий ден шинча черым эмлыме, респираторный инфекций деч кушкыл препарат ден тутло пушым кучылтмо, миодистрофийым жапыштыже рашемдыме йӧн-влак, пробиотикын пайдалыкше, икшывым чын пукшымо да шуко моло нерген лийыныт.
– Ме, тазалык аралтыш аланыште тыршыше-влак, шинчымашнам жаплан келшышын нӧлтышаш, тӱнямбалне лекше тӱрлӧ у черым эмлен моштышаш улына. Тидын шотышто куштыжо икте-весынам палдарена гын, куштыжо тыгай шотан конференций-влак моткоч сайын полшат, – медик-шамычын иквереш погынымо амалыштым рашемда Рита Геннадьевна.
Таче азам ыштен кертме тазалыкылан поснак кугу тӱткыш ойыралтеш, да педиатр-влак ончылан таза ӱдыр-шамычым кушташ задачым шындыме. Пӱсын шогышо йодышым конференцийыштат лончылымо: Казань кугыжаныш медицине академийын акушерстве да гинекологий кафедрыжын профессоржо Татьяна Земфирова подростко ӱдыр-влакын анемий дене кунам да молан черланен кертмышт, тиде ситыдымашым жапыштыже ужын шуктымо да эмлыме кӱлешлык, тыгак азап деч аралалтме йӧн-влак дене палдарен, Татарстан Республикысе Йоча клинический больницын эндокринологий отделенийжым вуйлатыше Мария Шайдуллина организмыште йодым ситарыме йӧн-шамыч нерген радамын каласкален.
– Организмыште йодын ситыдымыжлан кӧра черланыше йоча-шамыч мемнан кундемыштат ситышын улыт, сандене тиде лекцийым пайдале семын аклем. Тыгак Санкт-Петербург гыч медицине науко кандидат, «Евромед Дентал» клиникын тӱҥ врачше, йоча стоматолог Ирина Кобиясован илыме икымше 1000 кече шотышто программе да пӱйын тазалыкшым эскерыме йӧн-влак нерген лекцийже моткоч оҥай ыле. Конференций лектор-влакым шинчашкышт ончен колышташ, кумдан палыме профессор, медицине науко доктор да кугу опытан моло специалист дене шинчаваш мутланаш, нунын полшымышт дене тӱрлӧ йодышым рашемдаш йӧным ыштымыж дене шергакан лийын. Тушто погымо шинчымаш ден опытым ынде илышыште кучылташ тӱҥалына, – мероприятийым акла Рита Геннадьевна.
Маргарита ИВАНОВА
Р.Тойшеван еш албьомжо гыч фото
