Российысе Федераций Советыште Марий Эл деч сенатор Сергей Мартынов паша дене Шернур районыш миен коштын.
Тудо Марий Эл Кугыжаныш Погын депутат Владимир Кожанов да Шернур муниципал округ вуйлатыше Александр Кугергин дене пырля Кукнур школышто капитально олмыктымо паша кузе кайымым терген. Кугыжаныш тидлан 74 миллион теҥгем ойырен. Пашам «Строительная компания Орион» ООО 19 январьыште тӱҥалын да августышто мучашлышаш. Йӱштӧ ден шокшо вӱд, оралтым ырыктыме, электроснабжений системе-влакым, канализацийым, леведышым тӱрыс вашталтат. Класс, административный кабинет, спорт ден актовый зал-влакым, кочмыверым, коридор ден рекреацийым уэмден олмыктат. «Единый Россий» партийын проектше дене келшышын, тыгак школым кызытсе жаплан келшыше оборудований, мебель дене пойдарат. «Кугыжанышна кажне икшывылан тӱткышым ойырымым ик эн тӱҥ задачылан шотла», – палемден сенатор.
Сергей Мартынов тыгак марий Йӱштӧ Кугызан илемыштыже уна лийын. Тушто тудым кугу уна семынак вашлийыныт да илем мучко ужатен коштыктеныт. Сенатор марий коҥгаште команмелнамат кӱэштын ончен.
Фотом Кукнур школын да «Йӱштӧ Кугыза – Марийский Дед Мороз» воткыл лаштыкла гыч налме.
