«МАРИЙ ЭЛ» ТАЧЕ

Шокшо толеш, вӱд воктеке чон шупшеш…

Кеҥеж тӱҥалын гынат, республикыште эше пляж-влак пашам огыт ыште. Кунам эше ышташ тӱҥалыт, тыгак рашыжак огыл манашат лиеш. Тидын нерген Россий МЧС-ын Марий Элысе территориальный управленийжын пресс- службыжат эше раш вашмтум пуэн огыл.

А теве Йошкар-Оласе мерийын пресс-службыжын увертырымыж почеш, марий рӱдолаште пляж-влакым 1 июль гыч почыт. «Рӱдо да «Южный» пашам ышташ тӱналыт. Кызыт нунын кумдыкым шотыш кондат, вӱд пундашым эрыктат. А республик мучко чылаже 15 пляж пашам ышташ тӱҥалшаш. Утарыше пост-влак тушто 9 шагат кечывал гыч 20 шагат кас марте лийыт. Эпидемий шуйнымылан кӧра санитарный да гигиене мероприятий-влакымат эрдене да кастене пляж почылтмо да пляж петыралтме деч вара шагат наре эртараш тӱҥалыт.

Козьмодемьянскыште, Юл эҥерыште, пляжым 21 июнь деч вара почаш палемдыме. Тидын нерген оласе администрацийышт увертарен.

Пляж-влак петырыме улыт гынат, йӱштылаш шонышо-влакым тиде веле огыл, эсогыл карантинат огыт шогалте. Манмыла, шокшо игече вӱд воктеке каяшак кумылаҥда. Эсогыл вӱдыш пураш чарыме верымат ойырен налше-влак лектыт. Тидлан корак, очыни, тений шошо-кеҥеж жапыште ныл еҥат туткарыш логалын. пытартыш случайже Шернур районышто лийын.

Но иктым ушештаренак кодыман: кугурак ийготан еҥ-влак вӱд воктене лиймышт годым икшыве-влакым эскерышашак улыт, шкетыштым кодыман огыл.

Утарыше-влакын темлымышт почеш, вӱдыш пураш шонымаш уло гын, икмыняр правилым палыман. Эн ончыч — икымше полышым пуаш тунемман. Поснак икшывылан ончылгоч вӱдышто тукарыш логалме деч кузе утаралтме шотышто шинчымашым пуыман. Мутлан, йоча вӱд йымаке кайымым шижмеке, кидше дене лупшкедылме олмеш, эн ончыч мӧҥгешла вӱд йымаке пурен кайышаш да угыч ӱмбаке лекшаш. Вӱд ӱмбалне ик минут деч утларак лиймеке, шке йыр ик гана савырнышаш. Тидыже вӱд гыч лекташ йӧным почеш. Вара ӧрдыжкӧ ийын кайыман. Ӱнарым налмеке, серышкат шуыда. Нине правилым бассейныштат кучылташ темлалтеш.

С.НОСОВА ямдылен

Опубликовать в Одноклассники

Добавить комментарий