Шере мӱят сеҥымашым лишемда
Марий Элысе мӱкшызӧ-влакын «Марий отар» региональный мер ушемыштын членже-влак специальный военный операцийын участникше-влаклан мӱйым, тыгак окопым волгалтараш сортам колтат.
Мер ушемын председательже Павел Свинин тыге каласыш:
– Марий мӱкшызӧ-влакат сӧй пасушто сеҥымашым лишемдышаш верч кучедалше салтакна-влаклан кертмышт семын полшат. Тӱҥ сатуштым, мӱйым, мер ушемын Шернур трактыште верланыше кевытышкыже кондат. Кызыт марте 1150 килограммым погымо да салтакна-влаклан колтымо. Тыгай гуманитар полышым кызытат погена. Утларак чолгалан Марий Турек, Шернур, Кужэҥер районласе мӱкшызӧ-влак шотлалтыт. Нуно пайдале кочкышым иканаште куботейнер (тушко 23 литр але 35 килограмм мӱй пура) дене кондат. Посна мӱкшызым ончалаш гын, Кужэҥер район гыч Олег Петуховым, Юрий Грязиным палемдаш лиеш.
Салтак-влакын илышышт йӧршынат куштылго огыл, ятыр нелылыкым чыташ, жапым окоплаштат эртараш перна. Туштыжо южо вере волгалтараш сорта-влак гына полшат. Тидлан мӱкшызӧ-влак 70 килограмм шыштым погеныт. Сортам ышташ шыштым Медведево районысо Пурсанур селашке, Кужэҥер район администрацийышке, тыгак «Теплая речка» кафешке пуымо. Тушто шыште гыч сортам велат, да ме погымо пунктыш намиен пуэна.
Ме Морко посёлкышто илыше, мӱкшым Олыкъялыште кучышо да ик куботейнер мӱйым сӧй пасушто сеҥымашым таптыше Россий салтак-влаклан колтышо А.Александров дене мутланышна.
– Мый мӱкшым ынде пеш шукертсек ашнем, – ойла Анатолий Александрович. – Кызыт ялыште витле омарта мӱкшем уло. Кодшо ий марте мӱкшым телылан омшаникыш пуртенам гын, ты гана уремешак кодышым. Вет ийготат погынен, неле омартам омшаникыш нумалаш да шошым мӧҥгеш лукташ ынде еҥжымат от му. Кодшо ийын мӱй шагалрак лекте, идалыкшак келшыше огыл ыле. Шыжым лудынам ыле: Башкортостан Республикысе мӱкшызӧ-влак мӱйыштым СВО-н участникше-влаклан колтат. Мыят шке кумылын нунын радамыш ушнышым, ик куботейнер мӱйым «Морко мланде» райгазет редактор Анатолий Титовлан машинашкыже шынден колтышым. Шонем, мыйын колтымо мӱй дене шочмо элым аралыше салтакна-влак чайым уло кумылын подылыт, да вий-куатышт, чолгалыкышт эшеат чот ешаралтыт. Тыге сеҥымашым лишемдымаште мыйынат изи надырем лиеш манын шонем.
В.Смоленцев
Снимкыште: мӱкшызӧ А.Александров.
Авторын фотожо
