20 апрель гыч 10 май марте уло Российыште семынак Марий Элыштат «Шарнымаш сад» экологий акций эрташ тӱҥалеш.
Марий Элын Пӱртӱс поянлык, экологий да йырым-йырысе средам аралыме министерствыжын увертарымыж почеш, тудын кышкарыштыже Йошкар-Ола деч тораште огыл, 2021 ийысе чодыра пожар годым йулышӧ кумдыкышто, 250 тӱжем пушеҥге озымым шындаш палемдыме. А чылаже тений шошым гына республикыште 1100 гектарыште 3 миллион наре ужар кушкылым вераҥдат. Тӱҥ шотышто ты паша «Сосновый бор» санаторий ден Щучье ер воктене каяш тӱҥалеш.
Пушеҥгым шындаш кумылан-влак 8 (8362) 42-06-31, 89371177365 номеран телефон дене ончылгоч йыҥгыртен але mariles-vost@yandex.ru электрон почтыш серен шижтарышаш улыт.
С.Носова
