Кум ий ончыч 17 майыште Россий президент В.Путинын кӱштымашыж почеш мемнан элыште Культурный инициативе президент фонд ышталтын. А кодшо ийын Марий Элыште ты фондын проект офисше Калык тӱвыра рӱдер пелен почылтын.
Тудын пашажым республикысе Калык усталык рӱдер вуйлатыше Эльвира Куклина виктара. Лач ты кечын рӱдерыште фондын кум ияш лӱмгечыжлан пӧлеклатше «Тӱвыра толкын» торжественный мероприятий эртыш. Тушко тиде жапыште фондын полшымыж дене илышыш шыҥдарыме проект-влакын авторыштым, тидын нерген утларак пален налаш шонышо чолга еҥ-влакым ӱжмӧ. Погынышо-влакым Марий Эл Правительстве председательын алмаштышыже — тӱвыра, савыктыш да калык-влакын пашашт шотышто министр Константин Иванов саламлен. Культурный инициативе президент фондын генеральный директоржо Роман Кармановын саламлымашыже видео-йӧн полшымо дене йоҥгалтын.
Эльвира Викторовна чылаштым ты лӱмгече дене саламлен да офисын илышыже, тудын полшымо дене илышыш шыҥдарыме проект паша дене палдарен. Ончыктен кодыман, ты жапыште республикыште темлыме 255 проект йодмаш гыч эксперт-влак, латнылытшым шыҥдараш келшышылан шотлен, шийвундым ойыреныт. «Президент фонд полшымо дене тӱвыранам пойдараш полшышо ятыр сай шонымашым, поснак – верлаште, шыҥдараш йӧн лектын. Тидланже йодмашым гына возаш тунемман»,– ойла Эльвира Куклина. Сай проект-влакым возаш офисын эртарыме семинарлаштыже тунемаш йӧн уло.
Тиде кум ий жапыште Россий мучко 7000 проектым сайлан шотлымо. Нуным илышыш шыҥдараш фонд 25 миллиард теҥгем ойырен, Марий Элыште сеҥышыш лекше латныл проектлан – 11 миллион утларак теҥгем.
«Мемнан задачына – сай проектым утларак возаш. Тӱҥалме корнына кужу, да илышнам тӱзаташ полшен кертше шонымашна утларак лийышт», – каласыш офис вуйлатыше.
Мероприятийын вес ужашыштыже сеҥышыш лекше икмыняр проект дене палдареныт. Нунын коклаште «Виктория» йоча музыкальный театр» автономный коммерческий огыл организаций лийын. «Циолковский, ты был прав!» интерактивный спектакльым кузе шындыме паша дене художественный вуйлатышыже каласкалыш. Кодшо ийын президент фонд грант кӱшешак «Марий йомак» кинолабораторий шочын. Тудын пашажым режиссёр Денис Шаблий виктарен. Лач тудлан кӧра республикыште марий кином войзымо паша ылыж каен.
25 майыште грант шийвундо кӱшешак Козьмодемьянскыште вокально-инструментальный ден рок-ансамбль-влакын регион-влак кӱкшытан «ЭтноСем. ЭтноМелодий» фестивальышт эртышаш. Икманаш, фонд полшымо дене шуко сай вашталтыш илышыш пура. Нине сай пример дене палдарымаш проектым возаш шонышо-влаклан шинчымашыштым пойдараш полшен. Мероприятий годым нунылан образовательный шагат эртаралтын.
С.Носова
Снимкыште: мероприятий годым.
Авторын фотожо.
