Тенийысе вӱдшорлан кӧра туткарыш логалше сурт ден мланде участке-влакын озаштлан ик гана материальный полышым ойырат.
Тидын шотышто Марий Эл вуйлатыше Юрий Зайцев пунчалыш кидпалыжым пыштен.
Вӱд йымаке логалше мланде участке-влакын озашт 10 тӱжем теҥгем, вӱдыш кайыше сурт-оралте-влакын озашт 40 тӱжем теҥгем налыт. Озан сурт ден участкыжат вӱдыш логалын гын, 50 тӱжем теҥгем ойырат.
Тиде полышым кузе налман? Йодмаш дене муниципал образованийын администрацийышкыже лекман. Тудым 20 паша кече жапыште ончышаш улыт. Тергымашым эртарымеке, оксам ойырымо шотышто пунчалым луктыт. Тыгай полышым налшашлык граждан-влакын спискыштым 1июль марте ыштен шуктышаш улыт.
Михаил Скобелевын фотожо
