Шарнымаш чоныштынак ила
Юрий Зайцев вияш эфирыште эртыше «Вахта памяти» телемарафонышто лийын.
Республикым вуйлатыше вияш эфирыште «МЭТР» телеканалын ведущийже-влакын йодышыштлан вашештен. Иктыже сарын йочаже, тушто кредалше, концлагерьлаште шинчыше-влаклан полышым пуым дене кылдалтше лийын.
Регион вуйлатыше лўмгече деч ончыч неле сар пагытым илен лекше чыла категорий еҥ-влаклан социальный полышым пуымо нерген ойлен. 1927 ий 1 январь гыч 1945 ий 31 декабрь марте шочшо сарын икшывыже-влаклан тений лўмгече лўмеш 5 тўжем теҥгем тӱлат. Сарыште лийше ветеран-влаклан илыме олаштын але районыштын «Почётан гражданинже» лўмым пуат. Тыгак нуныланат ик гана пуалтше выплатым ыштат.
Юрий Зайцев Сеҥымаш лӱмгечылан Медведево посёлкыштат Курымашлык тулым чӱктымӧ да моло шарныктыш-влак лийме нерген ушештарен.
«Ме эше ик Курымашлык тулым Медведево посёлкысо Воинский Чап монумент воктене чӱктена, а тудым тушко Моско Кремльысе Александровский садыште улшо Курымашлык тул гыч кондена», – палемден Марий Эл вуйлатыше.
Йошкар-Олаште Воинский Чап да «Радиационный туткарлан кӧра колышо-влаклан» мемориалым уэмдат, Рӱдӧ паркыште брусчаткым алмаштат да моло пашам шуктат. Икманаш, пайремлан рӱдола эшеат сылнештеш.
Тыгак Суслонгерыште мемориалым уэмдаш палемдыме. Кычалше-влаклан кӧра сусыргымо да черланыме деч вара колымекышт посёлкышто тойымо сарын 800 участникшын лӱмжым рашемдыме.
Марий Эл вуйлатыше соцсетьлаште «Подвиг на века» акцийым эртарыме нерген ушештарен. Тушко Сеҥымаш верч кредалше лишыл еҥышт-влак нерген каласкалаш кумылан еҥ-влак ушнен кертыт.
«Мыланем тиде шкемын историем – кок кочамат 1941 ийыште сарыш каеныт да пєртылын огытыл. Офицерын эргыже, мый изи годсек Кугу Отечественный сарыште кредалше-влакын подвигыштым пагален тунемше, тиде шарнымашым аралаш кӱлмым умылем. Сар годсо фото, серыш ден медаль-влак – тиде ешнан реликвийже», – палемден Юрий Зайцев.
Марий Эл вуйлатышын пресс-службыжын уверже негызеш Евгений Садовин ямдылен.
Денис Речкинын фотожо.
Марий Эл вуйлатышын пресс-службыжын уверже негызеш Евгений Садовин ямдылен.
Денис Речкинын фотожо.
