«Уло еш дене»
Российыште 15 декабрь гыч тыгай лӱман еш проект шуйна.
Тушко Марий Эл гыч еш-влакат ушнен кертыт.
Проектым «Я помогаю детям» мер организаций илышыш шыҥдара. Тудын дене келшышын, арнялан ик гана еш-участник-влаклан могай-гынат заданий пуалтеш да тидым нуно уло еш дене ыштышаш улыт. Мутлан, кас кочкышым чылан пырля ямдылыман, тоштерыш миен толман але спорт дене заниматлыман. Тылеч вара заданийым пырля шуктымым ончыктышо фотографийым ВКонтакте але Одноклассники соцкыл тӱшкашке #всейсемьей хештег дене шындыман. Марий Эл гыч еш-влак тыгак мемнан регионысо #всейсемьей12 хештегым вераҥдышаш улыт.
Организатор-влак проектын участникше-влак коклаште кажне тылзын пӧлекым модылтат. А март мучаште эн чолга еш-влакым палемдат. Нунылан шергакан пӧлекым кучыктат. Тыгак «Больше, чем путешествие» проект деч Россий мучко ончен кошташ 100 еш тур ойыралтеш.
Проектыш Российыште илыше икшыван кеч-могай еш ушнен кертеш. Тидлан соцкыллаште тыгай адрес дене регистрацийым эртыман:
https://ok.ru/group/70000004698632
«Всей семьей» проект нерген тӱрыс уверым тудын официальный сайтыштыже пален налаш лиеш. Адресше тыгай: всейсемьей.рф
Теве, мутлан, мемнан республикысе Волжский район гыч Тамара Яранцева икшывыже-влак дене тиде проектыш ушнен. Нуно чылан пырля Рошто пайремлан ямдылалтыныт да пельменьым иквереш ыштеныт (снимкыште).
Л.Камалетдинова
Т.Яранцеван соцкыл лаштыкше гыч налме фото
