Рушарнян, 26 майыште, пӱтынь Россий мучко «Единый Россий» партий ончылгоч йӱклымашым эртарен.
Кызытеш палдарыме почеш, эн чолган Тыва Республикыште да Йӱдвел Осетийыште йӱкленыт.
«Единый Россий» партийын Генсоветшын секретарьже Андрей Турчакын ойлымыж почеш, праймериз жапыште законым пудыртымашат вашлиялтын. Но кызытеш пуымо данный дене келшышын, тыгайже пӱтынь эл мучко 40 деч шуко лийын огыл.
Марий Элыште кечываллан 14 тӱжем утла еҥ йӱкленыт. Тышеч 3,5 тӱжемже – Йошкар-Олаште илыше-влак. Рашемдыме почеш, южо участкылаште эсогыл черетыште шогаш логалын – шке гражданский порысыштым шукташ кумылан-шамыч тунар шукын лийыныт.
Кызытеш улшо данный почеш, тӱрыс налмаште республикыште ончылгоч йӱклымашке 28 тӱжем утла еҥ ушнен. Нуно ты кечын Марий Элыште пашам ыштыше 104 избирательный участкыште шке йӱкыштым пуэныт. 14 участкыже рӱдолаштына верланен ыле.
Участке-влакым петырыме жаплан йӱклымӧ процедурым пудыртымаш да комиссий член-влак велым шкем закондымын кучымаш палдырнен огыл.
Ты гана праймеризыш Марий Элыште 1945 еҥ регистрироватлалтын. Нунын кокла гыч утларак йӱкым погышо-влак ончыкыжым Марий Эл Кугыжаныш Погыныш да верысе самоуправлений органлашке «Единый Россий» партий деч кандидат семын сайлымашке ушнат.
Ончылгоч йӱклымаш спискыш пуртымо кандидат-влак кокла гыч иктыже – Марий тӱвыра рӱдер вуйлатыше Наталья Пушкина. Праймеризыш икымше гана ушнышо еҥ семын шонымашыжым пален налаш кумыл лекте:
— Праймеризыш ушнымаш – эн ончычак моткоч кугу ответственность. Семынем чотак тургыжланенам. «Кӱлеш наре йӱкым поген кертам мо?» — шонкаленам. Вет мый йоча дене декретыште шинчем да еҥ-влак дене тӱҥ шотышто кок арнялан ик гана веле вашлийынам. А кӱлеш ыле чӱчкыдынрак. Мый денем таҥастарымаште, пашам ыштыше-влак калык дене вашлиймашым утларак эртареныт, мутланеныт. Туге гынат праймеризыште эртенам. А кандидат семын мый шочмо Морко районысо Шале ял шотан илем администраций да рӱдӧ илем деч темлалтынам. Нине участкылаште мылам 513 еҥ шке йӱкшым пуэн. Тыге мый кокымшо верыште улам.
Вес еҥже – Йошкар-Оласе 2-шо номеран поликлиникын филиалжын — Семёновко селасе врачебный амбулаторийын педиатрже Маргарита Тойшева:
— Мый ик мандатан 7-ше номеран «Ремзаводской» избирательный округ деч праймеризыш темлалтынам. Шкежат туштак йӱкленам. Ты участкыш пелашем дене эрдене лу шагат лишанрак мийышна. Тиде жапыште тушто калык шуко ыле. Мыйын верч 197 еҥ шке йӱкшым пуэн. Тидыже праймеризыште сеҥаш ситен огыл. Вес гана мылам одномандатник семын лекташ темлат. Кузе лияш, кузе лиеш – ончалына, шоналтена.
Ончылгоч йӱклымашын иктешлымашыжым чыла регион таче, 28 май. марте ыштен шуктышаш ыле.
Любовь Камалетдинова.
