УВЕР ЙОГЫН

Йӱштӧ Кугызана ойыртемалтын

ТурСтат аналитик агентстве тений телым эн пагалыме Йӱштӧ Кугыза-влакын рейтингыштым ямдылен. Тӱҥ шотышто турист-влакын Йӱштӧ Кугыза-влакын резиденцийышкышт миен коштмо чотыштым шотыш налыныт. 

Мо куандарен да ӧрыктарен: Марий Йӱштӧ кугыза ты рейтингыште кудымшо верыште шога. Тудын резиденцийже Шернур район Кукнур селаште верланен.

Лу эн пагалыме Йӱшто Кугыза радамым Вологодский областьысе Великий Устюг гыч Дед Мороз почеш. Тудын почеш Татарстанысе Яна Кырлай села гыч Кыш Бабай, Карелийысе Олонец ола гыч Паккайне, Бурятийысе Улан Уде ола гыч Саган Убеген, Удмуртийысе Шаркан села гыч Тол Бабай, Марий Йӱштӧ Кугыза, Мордовий гыч Акшамо Атя (Ульяновск область Кивать села), Чувашийысе Кшауши села («Ясна» этнокоплекс) гыч Хел Мучи, Ямал-Ненец АО (Горнокнязевск посёлко) гыч Ямал Ири да Тува (Кызыл ола) гыч Соок Ирей улыт. 

Устюгысо Йӱштӧ Кугыза шке шочмо кечыжым 18 ноябрьыште палемдаш тӱҥалеш. Тений У ий кож пелен икымше пайрем лач тушто эрта.

С.НОСОВА.

Опубликовать в Одноклассники

Добавить комментарий