Россий ФСИН-ын Марий Элысе управленийыштыже ты ведомствын вузлашкыже тунемаш пураш шонышо-влаклан Почылтшо омса кече эртаралтеш, палдара верысе пресс-службо.
Российысе вузлаште Марий Элын уголовно-исполнительный системыжлан тений 10 вер ойыралтын. Тыге кумылан-влаклан Рязань, Самара, Владимир, Пермь да Вологда олаласе тунемме верлаште шинчымашым очно налаш йӧн пуалтеш.
Кандидат-влак деч йодмашым кызытак налаш тӱҥалыныт. Тунемаш кыдалаш образованиян, ЕГЭ-н иктешлымашыж почеш вступительный экзамен-влакым сайын кучышо да пеҥгыде тазалыкан 25 ияш марте рвезе-влак пурен кертыт. Мут толмашеш, тачысе кечылан Наказанийым шуктышо федеральный службын вузлаштыже мемнан республик гыч 60 утла еҥ тунемеш.
Вашлиймаш 8 февральыште лиеш. Тудо управленийын конференц-залыштыже 14 шагатлан тӱҥалеш. Тушко кугурак класслаште тунемше-влак веле огыл, тыгак нунын ача-аваштат толын кертыт.
Республикысе УФСИН-ын адресше тыгай: Йошкар-Ола, Строитель урем, 94-ше номеран пӧрт. Лекше йодышым тыгай телефон дене рашемдаш лиеш: 68-65-84, 68-69-12.
Л.Камалетдинова.
