23 июньышто, рушарнян, Российысе икмыняр олаште кугу туткар—влак лийыныт.
Иктыже – каныш кечын кечывал гутлаште Севастопольышто.
«12 шагатат 15 минутлан кассетный боевой ужаш-влак дене снарядитлыме вич ATACMS американский оперативно-тактический ракете дене ончылгоч ямдылалтме почеш террористический актым ыштен лӱйкаленыт, – палдара Россий Обороно министерстве. Умбакыже увертаралтеш: «Тиде атакым чарыме годым ПВО-н дежурный вийже дене ныл ракетым южышто пытарен кертме. Визымшым южышто пудештарыме. Осколко-влак мландӱмбаке чоҥештеныт, да тидлан кӧра ятыр еҥ сусырген.
Теракт вашмут деч посна огеш код. Тудлан мутым эн ончычак Вашингтон куча. Лач тудо Украиныш тиде оружийым колтен».
Ик эн шукын Учкуевкысе пляжыште лийше-влак эмганеныт. Кызытсе жаплан 5 еҥ колен, 150 утла еҥ сусырген манын увертаралтеш. Нунын кокла гыч 5 икшыве поснак нелын сусырген.
Эмганыше-влаклан полышым эн ончычак теҥыз воктене моло каныше-влак пуаш тӱҥалыныт, вараже Севастопольысо эмлымверыш наҥгаеныт.
Теракт деч вара Российын президентше Владимир Путин вигак Севастопольын губернаторжылан йыҥгыртен. Эл вуйлатышын кӱштымыж почеш Севастопольыш Москва гыч медик бригадым колтеныт. Владимир Путин Севастопольышто илыше-влаклан чаманымашым каласен.
Следственный комитет «Теракт» статья дене уголовный делам тарватен.
24 июнь Севастопольышто да Крымыште траур кече семын увертаралтын.
Марий Эл вуйлатыше Юрий Зайцев телеграм-каналыштыже 23 июньышто теракт шотышто тыге палемден:
«Таче нацист-влаклан кӧра адакат мемнан элыште илыше тынысле калык колен. Тиде гана тушман мылам моткочак шергакан Севастополь ола ӱмбаке ракетым колтылын.
Лишыл еҥыштым йомдарыше севастополец-шамычлан кугу чаманымашым ойлем. Сусыргышо-влаклан вашкерак тӧрланаш тыланем».
* * *
Тиде кечынак, 23 июньышто, эше вес вере – Дагестаныште – кугу туткар лийын.
Республикын рӱдолаштыже, Махачкалаште, тыгак Дербентыште террорист актым ыштеныт.
Эн ончычак палыдыме-шамыч Махачкалаште синагогым йӱлатеныт, а вара ты олаштак Свято-Успенский соборыш да Дербентыште Покровский черкыш керылтыныт. Кастене 19 шагат лишан террорист-шамыч Махачкалаште ДПС постым лӱйкаленыт.
Дагестаныште осал пашам ыштыше чыла вич еҥымат кученыт да пытареныт. Нунын коклаште ты республикысе Сергокалинский район вуйлатыше Магомед Омаровын эргыже-шамыч, тукым шольыжо, ММА-ште (Mixed Martial Arts – смешанные боевые искусства) кучедалше боец лийыныт. Пытартышыже ончыч чапланыше боец Хабиб Нурмагомедовын ММА клубыштыжо тренироватлалтын, тудын лӱмжӧ денак таҥасен.
Район вуйлатыше Магомед Омаровымат кученыт.
Россий Федерацийын Следствий комитетшын данныйже почеш, террорист-шамычын титакыштлан кӧра Махачкалаште да Дербентыште кызытсе жаплан чылаже 20 наре еҥ колен. Нунын коклаште правам аралыше органлаште тыршыше, тыглай еҥ-влак да священник улыт.
Республикыште 23 июньышто контртеррористический операцийым увертареныт. Национальный антитеррористический комитетын палдарымыж почеш, теҥгече 8 шагатат 15 минутлан тиде операцийым да КТО режимым чареныт.
Дагестан Республик вуйлатыше Сергей Меликов палемден: кызыт кугыжаныш кучем ден правам аралыше орган-влак ситуацийым контрольышто кучат. Тыгак тудо Дагестаныште 24, 25, 26 июньым траур кече семын увертарыме нерген указым подписатлен.
Рушарнянак Россий ден Абхазий чекыште, КПП кумдыкыштат, Псоу эҥерыште, лӱйкалымаш лийын.
Пытартыш кечылаште Российысе эше икмыняр регионышто беспилотник-влак дене пайдаланен, терактым ышташ тӧченыт, палдара Россий Обороно министерстве. Но нуным мемнан ПВО системе-влак, пиалеш, южыштак кучен кертыныт.
Ӧрмаш, чыла тиде кугу черке пайрем – Тройчын – кечын лийын!
Тушман-влакын калык да конфессий кокласе келшымаш кылым пудырташ тӧчымышт Российым огеш лӱдыктӧ. Кеч-могай пашаланат мучаш садак уло.
Любовь Камалетдинова
Снимкыште: Дербент
Авторын фотожо
