Российысе калык-влакын ассамблейыштын Марий Элысе региональный пӧлкаже Кугу Отечественный сарыште Сеҥымашлан 80 ий темме лӱмеш шкешотан пӧлекым ямдылен.
Йошкар-Олан сӧрал верыштыже, Изи Какшан эҥер серыште чылалан кумдан палыме «Катюша» муро шым йылме дене: татарла, марла, армянла, казахла, аварла, грузинла да рушла – йоҥгалтын.
– Сеҥымаш кече – тиде эн вучымо пайрем. Тиде сеҥымашым Совет Ушемын шуко национальностян калыкше конден, нуно сар годым тушман ваштареш пырля кредалыныт. Лишыл еҥыштым, йолташышт-влакым йомдареныт, но элнан чапшым арален коденыт, – каласен Российысе калык-влакын ассамблейыштын Марий Элысе региональный пӧлкажым вуйлатыше, Марий Эл Кугыжаныш Погын председательын икымше алмаштышыже Лариса Яковлева. – Кугу юбилей вашеш ме, ассамблейын еҥже-влак, сеҥымашым ончыктышо, ӱдырамаш лӱм дене лӱмдалтше муро дене коча ден кугезе кочана-влак ончылно порыснам шуктынена.
А 3 майыште Чувашийыште Чечня Республикын Главажын представительже, чечен-влакын калыкле-тӱвыра автономийыштын вуйлатышыже Салман Майрукаевын ӱжмыж почеш Марий Элысе ассамблейын делегацийже «Дети гор» хореографий ансамбльын концертыштыже лийын.
Сценыште саламлышыжла Лариса Яковлева ончыч ойлымо мутшым уэш пеҥгыдемден каласен: «Тунамсе шучко сарым Совет Ушемын тӱрлӧ национальностян калыкше сеҥен. Сеҥыше тукымын шочшышт, уныкашт-влак кызытсе историйым ыштат. А ме, тӱрлӧ калык гыч лекше-шамыч, шкенан келшымашна дене Россий калыкше дене виян манмым уэш пеҥгыдемдышаш улына.
Лидия Семенова
Пошкудо Чуваш Республикыш унала мийыме годым.
Л.Яковлеван соцкыл лаштыкше гыч налме фото
