7-11 ноябрьыште Йошкар-Олаште Марий Элысе композитор-влак ушемын съездше лиеш.
Тудо организацийын 85 ияш лӱмгечыжлан пӧлеклалтеш. 1940 ийыште ушемым ыштымеке, икымше председательжылан Лев Сахаровым шогалтеныт. Варажым ты пашам землякна, лӱмлӧ музыкант-влак Яков ден Андрей Эшпаймыт да ятыр моло семмастар шуктеныт.
Кызыт ушемым Марий Эл Кугыжаныш премийын лауреатше, композитор Григорий Архипов вуйлата.
Съездын икымше кечынже самырык композитор-влак Олег Пашкин ден Елена Басова концертыш пагален ӱжыт. Тудо Национальный сымыктыш гимназийыште эрта.
Вес кечынже И.Палантай лӱмеш тӱвыра да сымыктыш колледжын А.Я.Эшпай лӱмеш кугу концерт залыштыже симфонический музык концерт лиеш. Тушто
ты колледж пеленысе симфонический оркестр мастарлыкшым ончыкта.
11 ноябрьыште гимназийыште камер музык концерт калыкым чумыра.
Чыла мероприятийышкат оксам тӱлыде пураш лиеш.
Алевтина БАЙКОВА
