Э.Сапаев лӱмеш опер да балет академический театр кеҥеж тургымыштыжо ынде кумшо ий почела кава йымалне спектакльым ончыкта. Тений пандемий да мероприятий-влакым эртараш чаракым ыштымылан кӧра йӱлаш пурышо фестиваль август мучашлан кусаралтын.
29 августышто театр коллектив Килемар район Ардембал ялысе «Раздолье» турист комплексыште икымше марий оперым, «Акпатырым», ончыктен.
Фестивальыш Марий Эл вуйлатыше Александр Евстифееват миен. Опер пытымеке, регион вуйлатыше артист-влак дене вашлийын мутланен, ончышо-влак лӱм дене нуным саламлен да ончыкыжымат пашаштышт кӱкшытыш шуаш тыланен.
– Уло кумылын тыланда таум ойлем. Жап вашталтеш, но тыште сюжетшат, артист-влакын модмыштат моткоч келшен толыт. Сюжетыште калык коклаште икте-весым пагалымаш палдырна. Тидыже тыршен ыштыме усталыкда дене келшен толеш, те шкендам сайын почын ончыктенда, — ойлен Марий Эл вуйлатыше.
«Акпатыр» — икымше марий опер. Тудын премьерже 1963 ий 5 апрельыште МАССР-ын драме театрыштыже эртен.
Оперыште действий Пугачевын вуйлатыме восстаний жапыште эрта. Марий патыр тиде кредалмашлан ӱшанле лияш товатла. Постановкышто тунамсе саманым авалтыше романтике шӱлышан тӱҥалтышак куандара: калык хор, вучымаш, Акпатырын калык дене вашлиймашыже, Шочмо эллан ӱшанле лияш товатлымашыже, сӱан йӱлам моторын ончыктымаш да калык мурым мастарын йоҥгалтарымаш.
Кава йымалсе фестиваль ончаш толшо-влакым ик жаплан эртыше илышыш пӧртылта. Пӱртӱс моторлык спектакльын ик эн тӱҥ геройжылан шотлалтеш. Марий сем ден шочмо кундем оперлан вий-куатым ешареныт, сандене тудо театрын произведенийже огыл, а калыкын илышыжым почын ончыктышо сӱретыш савырнен.
«Акпатыр» опер, EventInRussia.com порталын данныйже почеш, 2020 ийыште эн сай 200 событий радамыш пура. Тиддеч посна тудо 2019 ийыште Russian Event Awards национальный премийын сеҥышыжлан шотлалтын.
Кажне ийын фестивальыш республикыште илыше веле огыл, Киров, Нижегородский областьла, Чуваш, Татарстан республикла гыч уна-влак толыт.
Э.Сапаев лӱмеш опер да балет академический театр «Кеҥеж тургымым» 2011 ий гыч пӱртӱсыштӧ але архитектур ансамбльыште эртара.
Эрик Сапаевын оперже «Раздолье» турист комплексын кумдыкыштыжо 2017 ий гыч ончыкталтеш. Тиде жап гычак тудо национальный тӱвыран брендше семын кажне ийын калыклан темлалтеш.
Марий Эл вуйлатышын организаций да
аналитике виктемжын уверже негызеш
А.БАЙКОВА ямдылен.
Д.Речкинын фотожо
