Куштылго атлетике
Сеҥышылан – велосипед
20 майыште Йошкар-Олаште «Зелёный марафон» таҥасымаш 10-шо гана эртен. Ты гана стартыш 1500 утла спортсмен лектын. Тудыжо Патриарший площадьыште пуалтын.
Спорт мероприятий пеш сайын эртен. Тидлан игечыжат сай шӱкалтышым ыштен. Участник, тыгак ончаш толшо уна-шамыч мӧҥгышкышт поро кумылан пӧртылыныт.
Лу километр кужытышто икымше верым пӧръеҥ-влак коклаште Станислав Егоров, а ӱдырамаш-шамыч коклаште Ирина Соловьёва налыныт. Тыгодым 4200 метр кужытышто Юлия Подыганова ден Дмитрий Чекулаев эн тале лийыныт. Ты гана сеҥыше-влак мӧҥгышкышт велосипед дене кудалыныт, вет ончыко лекшылан лач тыгай пӧлекым пуэныт.
Тиде стартыште программе почеш кумылан-влак скандинав коштмашымат ойырен кертыныт, спортын тиде видыштыже вий-куатыштым тергеныт.
– Ты гана куржталме корнем пиаланак лийын: икымше верыш лектынам. Пӧлекшат куандарыше – велосипед ден тутло фрукт. Тыгай спорт мероприятийым эртарен колтымыштлан организатор-влаклан моткоч кугу тау, – палемден Станислав Егоров.
Тыгай мероприятий таза илыш-йӱлам илышыш шыҥдарыме куштылго атлетикым вияҥдыме амал дене эртаралтеш, но эн тӱҥжӧ – тиде проект эше пӱртӱсым аралыме шотан, вет «Ужар марафон» экологий дене кылдалтше йодышлан келыштаралтын.
Е.Эшкинина.
