СПОРТ

Шолеман йўрат чаракым ыштен огыл

Шернур районышто «Сокол» футбол командым чумырымо годсек  йўлаш пурышо футбол тургымым майысе «пулько» дене почыт. Ты гана участник, тыгак ончышо-влакым игече шўлыкаҥден. Шолеман йўр нӧртен да пеш йўштӧ  лийын. Туге гынат май пайремлан пӧлеклалтше турнирыш, Шернур посёлкысо стадионыш, 13 команде чумырген. Нунын коклаште у сборныят лийын. Модмаш кок тур дене эртен. Икымшыште лу команде таҥасен. Тушто у команде-влак: «Юниор», «Поколение», «Легенда» – вийыштым тергеныт.

Кокымшо турышто шокшырак лийын. Игечат левештын. «Кукнур» «Дружба» командым 2:1 счёт дене сеҥен. «Юниор» «Чендемерово» сборныйым 2:0 дене ончылтен. «Восход» пенальти дене «ДЮСШ» командым эсогыл 12:11 счёт дене сеҥен. «Мустаево» командын тале да мастар улмыжым поснак палемдыман. Тушто, чынжымак, чолга да ойыртемалтше футболист-влак лийыныт, сайын да оҥайын модыныт. «Поколение» у командым 4:1 счёт дене сеҥен. Кокымшо пелефиналыште «Восход» дене вашлийын. Ойыртем кугу лийын огыл гынат, «Мустаево» ончыко лектын. Финалыште «Юниор» дене таҥасен. Тўҥалтыште кок мечым соперник-влак пуртеныт. Сандене чылан нунак сеҥат манын шоненыт, но… Мустаевец-влак ик мечылан ончылтен, адакат оҥай модмаш тўҥалын. Самырык-шамыч адакат ик голым пуртеныт (3:2 счёт). Тыге «Юниор» команде кубокын озаже лийын.

Е.Эшкинина.

Опубликовать в Одноклассники

Добавить комментарий