Эпидсезон тӱҥалме деч вара Марий Элыште пудий 1165 еҥым пурлын, ты шотыштак – 258 йочам. Лабораторий шымлымаш пудий боррелиоз дене черланыме вич случайым пеҥгыдемден. Тиде чотыш тӱҥ шотышто Йошкар-Олаште да Медведево районышто илыше-влак логалыныт.
Июльышто пудий 65 еҥым пурлын. Тиде копшаҥге республикысе чыла гаяк кундемыште чолга, поснак чодыраште, чодыран верыште, сад товариществыште да илыме кумдыкышто.
Тений айдеме капкыл гыч лукмо 191 пудийыште боррелийым мумо, пудий энцефалит вирусын антигенжым – шымытыште. Чыла шым еҥ серопрофилактикым эртен.
Ушештарена: капкылыш пижше пудийлан экспресс-диагностикым Гигиене да эпидемиологий рӱдерыште ыштыкташ лиеш. Услугын акше – 400 теҥге.
М.ИВАНОВА.
