Сеҥымаш дене да таза пӧртылза, патырна-влак!
26 сентябрь. Йошкар-Оласе «Арена» спорт манеж воктене шуко калык чумырген. Ты кечын Марий Эл гыч мобилизоватлыме пӧръеҥ-влакым служитлаш ужатеныт.
Ончыч ик автобус почеш весым районла гыч мобилизоватлыме-шамычым конденыт. Варажым, нуным, кугу автобусыш шынден, оркестр сем почеш ужатеныт. Мутат уке, родо-тукым, ача-ава-влаклан лишыл еҥым ужаташ неле, шинчавӱдат йоген.
Районла гыч мобилизоватлыме пӧръеҥ-влакым радам дене шогалтен, автобусыш ужатыше военный-шамыч кокла гыч иктыжын воктекше миен, лекше йодышым рашемдыде шым чыте.
«Умылыдымаш чынжымак шуко. Могай радам дене пӧръеҥ-шамычым чумыреда да мобилизоватлалтше-влак кушко логалыт?» – лие йодышем.
– Мутат уке, умылыдымаш лектеш. Тудыжо мыняр еҥым колтымо дене огыл кылдалтын. Шукыштым лач ты йодыш тургыжландара: кушко логалыт да мо лиеш? Ончыч чылан ешартыш ямдылалтмашым эртат. Варажым гуманитарный полышым пуымо верлашке да утарыме кумдыкым оролаш, порядкым эскераш, верысе калыклан полшаш колтат. А боевой действийыш военный специальностяным, боевой опытан-шамычым ойырат, вет нунын коклаште Чечняште, тыгак Сирийыште лийшат улыт. Тынар еҥым колтымаште, тӱрлыжат, йоҥылышат лиеш. Лекше йодышым, умылыдымашым верыштак але военкоматыште рашемдат, кӱлеш гын, мӧҥгешат колтат. Мемнан Марий кундемысе яллаште шуаралтше пӧръеҥ-влак ӱшанле, чын патриот да таза улыт. Нуныланат боевой действийыште лийше семынак, закон дене келшышын, чыла социальный выплате тӱлалтеш, контрактник семынак оксам налаш тӱҥалыт, – мане военный комиссариатын пашаеҥже Андрей Владимирович Кулишов.
Тачысе кечылан ситуаций могайракым Марий Эл правительстве председатель алмаштышын пашажым жаплан шуктышо генерал-майор Степан Воронцов рашемдаш полшыш.
– Россий президентын указше дене келшышын, частичный мобилизацийым эртарымашке республик вуйлатыше Юрий Викторович Зайцевын палемдымыж дене колтена. План почеш таче 287 еҥым колташ палемдыме. Тынарак дене ты арнян эше кок гана (вӱргечын, кугарнян) колтышаш улына. Тиде икымше этап. Кокымшо этап изиш варарак лиеш, вет ончылнына тыгай задаче: Марий Эл гыч чылаже 1700 еҥым мобилизоватлаш.
Кокымшо этап рӱдӧ военный округын решенийже почеш эрта.
Мобилизоватлыме еҥ-влакым Ульяновск область «Солдатская Ташла» воинский частьыште вашлийыт. Тушто нунылан шокшо вургемым (телылан келшышым) чиктат, малаш верым ойырат, мо кӱлешым туныктат, вет тудо Межвидовый туныктымо рӱдер. Варажым военный командованийын палемдымыж дене кушко колташ рашемдат. Украиныште неле ситуаций улмым чылан палат. Сандене тусо обстановкым шотыш налын ямдылат. А тидыже тачысе кечылан Российыште, республикыште ик эн тӱҥ задачылан шотлалтеш: мемнан пӧръеҥна-шамыч, ончылан шындыме боевой задачым шуктен, илыше да таза пӧртылышт», – мане Степан Александрович.
– Ужаташ толынна. Сайын служитлышт, аралышт эрыкым, мемнам да илыше пӧртылышт манын тыланена. Сеҥымаш дене вучена. Теҥгече марий ӱдырамаш-влак ӱжмашым пуэныт: олмам коштен, кажнылан пакет дене кучыкташ. Тидыже Волжский, Медведево районлаште ышталтын, южышт йӱдвошт коштеныт. Коштымо олмам военкоматыште корнышкышт пакет дене пуэныт. Адакшым ӱдырамаш-влак носким пидаш, вашке йӱштӧ лиеш, шокшо вургемым погаш тӱҥалыныт. Тидлан тӱҥалтышым «Серебряные волонтёры» рӱдер ыштен, – мане ужаташ толшо калык коклаште лийше Ветеран-влакын марий республиканский организацийжым вуйлатыше Михаил Крылов.
Е.Эшкинина.
М.Скобелевын фотожо.
