СВО-н участникше пулемётчик Александр ШЕСТАКОВ, отпускыш толмекыжат, Вӱрым налме да пуымо республикысе станцийыш донор семын миен.
– Ме шукынжо шагал огыл сомылым отпусклан палемдена. Но каныш жап моткоч писын эртен кая, да шукертак шонен коштмынам чӱчкыдынжӧ ыштен огына шукто. А тендан эн ончычак ышташ палемдыме сомылда – вӱрым пуаш. Молан?
– Койышем тыгай: чыла пашам мучаш марте шукташ. Латкандаш ияшем годым, а мый тунам Автодорожный техникумышто тунемынам, кугурак Алексей изам пеленже Йошкар-Олашке Вӱрым налме да пуымо станцийыш наҥгаен. Тудо тиде жаплан 40 донацийымат эртен улмаш! Станцийыш икымше гана пашаштыже ала-кӧлан положительный резус-факторан кокымшо группо вӱр кӱлмӧ годым миен. Тыге 2012 ий 20 апрельыште мыят икымше гана вӱрем пуэнам. Тыгодым ны йӧндымылыкым, ны корштымым шижын омыл да тышке ончыкыжымат кошташ шонен пыштенам. Кок арнялан ик гана плазмым пуэнам, таче кечылан 100 утла донацийым эртенам, Российын почётан доноржо улам. Тазалыкем сай, вӱрем пуэн кертам гын, тиде корно дене молан умбакыжат ошкылаш огыл? Адакше сарыште донор вӱрын акшым сайынрак умылет. Отпускыш визымше гана толынам, кажне ганажат Вӱрым налме да пуымо станцийыште лийынам.
– СВО-н участникше-влак коклашке кузе логалында?
– 2022 ий шыжым Йошкар-Оласе шыл комбинатыште пашам ыштымем годым военкомат гыч повестке тольо. Полкнам Ульяновск областьыште чумырышт да 8 октябрьыште Херсон велыш колтышт.
– Ача-авада ден пелашда мобилизаций шотышто мом маныныт?
– Специальный военный операцийышке кайымем шотышто пычырикат кокытеланен огытыл, вет мый армийыште десантыште служитленам. Кызыт кеч-кӧ кеч-мом ойлыжо, но мемнам изинекак патриотизм шӱлышеш куштеныт, да «Шочмо эл» мыланна йӧршынат пуста мут огыл. Пӧръеҥ-влак контрактым оксалан кӧра ыштат манмым колынам… Мемнан СВО кумдыкыш кайымына годым экипировко кокла гыч шукыжым шке окса дене наледенна да тидым нормылан шотленна.
– Эртыше кок ий утла пагытыште могай жап эн неле лийын?
– Конешне, тӱҥалтыш жап. Иктаж кум тылзе. «Олымбалне тыглай шинчылташ огеш лий – «кайык-влак» чоҥештылыт» ситуацийлан тунем шумешке.
– Шканда могай позывнойым ойырен налында?
– Позывной нерген йодмеке, кенеташте ӧрын колтенам: мыйын эсогыл лӱмедышем лийын огыл! «Йолташем-влак изамым Орёл маныныт, тугеже мыят Орёл лиям», – вашештенам.
– Тыныс илыш гыч эн чотшо мо ок сите?
– Еш. Вера ӱдыремлан мартыште шым ий темеш. Кызыт чыла умыла – йочасадыште сар да герой-шамыч нерген шуко каласкалат, коеш. А тылеч ончыч «ача походыш янлык-влаклан пӧртым чоҥаш каен» манын лыпландареныт. Лишыл еҥ ден родо-влак чылалан огыт сите, сандене телефон дене йыҥгыртымылан, мӧҥгӧ гыч посылкым колтымылан моткоч куанена. Шӱлыкан да йӧсӧ татлаште палыдыме йочан уло шӱм-чонжо дене сеҥымашым тыланен возымо серышыже кумылым нӧлталеш. Куат ешаралтеш. Тыгай серышлам мемнан кокла гыч шукынжо пеленышт коштыктат. А эше тушто жаритлыме кол ден аван пельменже огыт сите. Нине кочкышым моткоч йӧратем! Но нимо утым ида шоналте – ала-кӧн мӧҥгыштӧ роллым тамлымыж жапыште мемнан шемшыдаҥ пучымышым кочмына шотышто ӧпке йӧршынат уке.
– Ӱдырдан майыште садикыштыже – выпускной… Тушто лийын огыда керт… Чаманеда?
– Тиде кечын пырля лияш гын, сай ыле, конешне. Но, ик велым, кызыт тыгай шотан утренникыште ача-ава кокла гыч иктыже веле лийын кертеш. А, вес велым, отпускым университетысе сессийлан налаш тыршем. Кеҥежым дипломым аралаш кӱлеш, сандене отпускым тиде жаплан налнем.
– Те эше тунемыда?
– Да, МарГУ-што пытартыш курсышто заочно тунемам. Автодорожный техникумым йошкар диплом дене пытаренам, армийыш миен толынам, а вара ныл ий гыч университетыш пуренам. Кок ий шыл комбинатыште пашам ыштымем годым тунемынам да теве ынде кумшо ий – специальный военный операцийыште участвоватлымем жапыште. Команидирем – умылен моштышо айдеме, отпускым сессий жаплан келыштараш тырша.
– Александр, СВО-н участникше улмыдам шотыш налын, преподаватель-влак скидкым ыштат?
– Ой, уке! Оценкым мотор шинчан але военнослужащий улмылан огыл, а шинчымашлан шындат. Учебник-влакым пеленем СВО-шко налынам, тунемаш йӧн уло.
– Эн кугу шонымашда могай?
– Шонымаш огыл, а цель – Арбаныште пӧртым чоҥаш. Тиде Йошкар-Ола деч лу километр ӧрдыжтӧ. Мария пелашем ялыште илынеже.
– А специальный военный операций гыч лишыл еҥым вучышо-влаклан мом тыланеда?
– Тек вучен шуктат.
Марий Эл Тазалык аралтыш министерствын пресс-службыжым материалже негызеш Маргарита ИВАНОВА ямдылен
