У Торъял районысо Элембай ялыште «Шукшанский богатырский заставе» уло. Тудым верысе черкын протоиерейже Сергий Бажановын тыршымыж дене почыныт.
«Верысе инициативе» программышке логалме дене тыште пашам утларак чолган ворандараш йӧн лектын. А, мутлан, кеҥежым, июньышто, «Шукшанский богатырский заставыш» крепостной манме капкам шогалтеныт. Тудыжым Марий Эл Республикын «Культура Марий Эл на 2013-2025 годы» кугыжаныш программын «Сохранение объектов культурного наследия (памятников истории и культуры) народов Российской Федерации в Республике Марий Эл» подпрограммыжым илышыш пуртымо дене келшышын ямдыленыт.
Кызыт заставыште йоча ден подростко-шамычлан веле огыл, кугыеҥ-влакланат тӱрлӧ деч тӱрлӧ оҥай мероприятий эртаралтыт. Мутлан, рушарнян черке службо деч вара тышке верысе калык да «скандинавский коштмаш» дене тазалыкым пеҥгыдемдаш кумылан-влак погыненыт. Пытартышышт У Торъял район гыч веле огыл, эше Марий Турек вел ден Йошкар-Ола гыч лӱмынак толыныт.
Тӱҥалтыште капым лывырташ манын, разминкым пырля ыштымеке, «скандинавский коштмаш» дене тренер Алексей Алексеев чылаштлан мастер-классым эртарен. Тылеч вара уна-влаклан заставым ончыкташ нуным экскурсийыш наҥгаеныт. Погынышо-шамыч тыгак тиде коштмаш, республикыште тыгай клуб-влакын кузе пашам ыштымышт нерген мутланеныт, почеламутым лудыныт, мурым муралтеныт, тӱрлӧ таҥасымашлаште: канатым шупшмаште, пикш гыч лӱйкалымаште… – вийышт ден мастарлыкыштым тергеныт. Пытартышлан Отец Сергий дене пырля великомученик-влак Флор ден Лаврын памашышт деке миен, чурийвылышыштым шӱялтеныт да, ший гай вӱдым подылын, мӧҥгеш каяш вийым налыныт.
Л.КАМАЛЕТДИНОВА
