Кодшо вӱргечын республикын правительствыштыже Марий Эл вуйлатышын пашажым жаплан шуктышо Александр Евстифеев здравоохранений министерствын еҥже да рӱдоласе поликлинике-влакын тӱҥ врачышт дене кумдаҥдыме заседанийым эртарыш.
Тудо медицине учрежденийлаште, поснак Йошкар-Оласыште, пашам кузе виктарымылан пӧлеклалтын ыле. А тиде теве мо дене кылдалтын. Тылеч ончыч Александр Александрович рӱдоласе 1-ше ден 4-ше номеран поликлиникылаште лийын. Но тудо вуйлатыше семын да тергымаш дене огыл, а тыглай айдеме семын миен.
Икымше номераныштыже еҥ-влак медицине полышым кузе пуымо келша манын палемденыт гын, весыштыже моткочак сырен, вуйым шийын, шылтален ойленыт. Санденак, заседаний тӱҥалмеке, эн ончычак Александр Александрович Йошкар-Оласе кок поликлиникыш миен коштмыж годым регистратур-влак воктене шогышо еҥ-влакын тудлан мом ойлымышт гыч икмынярже дене палдарыш: аҥысыр специальностян врач-влак деке приемыш логалшашлан талоным налаш черетым 4 шагат эрденак налман; черетыште икмыняр шагат шоген эртарымекат, талон логалеш манын ӱшан уке; приемыш логалаш черетыште икмыняр кече почела шогыман; электрон черет уло, но тушко арня ончыч возалтман; терапевт деке логалаш, тудын полышыжым да больничный листым налаш черланышашнам ме арня ончыч палышаш улына; оксам тӱлет гын, яра приниматлыше специалист декак логал кертат. Тиде – ӧпке мут-влак кокла гыч икмынярже веле.
Республикын здравоохранений министрже Марина Панькова, нине ӧпке мут-влакым колыштмеке, Александр Евстифеевын молан тыгай сӱрет-влак вашлиялтмым умылтараш йодмыжлан вашешташ тыршыш да икмыняр темлымашым ыштыш: тыгай экшыкым кораҥдышашлан сай опытым кучылтман; первичный приемым эртараш, икымше медицине полышым пуаш посна пӧлемым ойырыман; врач-терапевт-влакын приемым эртарыме жапыштым 5 шагат марте шуйыман; участковый врач-влакым рецептым возымо, справкым пуымо, южо моло сомыл деч утарыман.
Заседанийыштак республикыште палдырныше вес неле проблемым – кадр ситыдымыме – йодышым каҥашышт. Тачысе кечылан Марий Элыште тӱрлӧ специальностян 261 врач огеш сите. Тышеч 108 врачшым районлаште вучат. Поснак участковый-терапевт, акушер-гинеколог, «Вашке полыш» врач, анестезиолог-реаниматолог кӱлыт. Целевой направлений почеш медицине вузлашке тунемаш колтымо-влак кокла гыч 2016 ийыште Марий Элыш 80 процентше гына пӧртылын. Тений 70 выпускник толшаш. Нунын кокла гыч 33 еҥжым ординатурыш тунемаш колтат. 2018 ийыште республикыш 8 участковый-терапевт пӧртылшаш. Марина Панькован палемдымыж почеш, аҥысыр специальностян медик-влак ончыкыжымат ситаш огыт тӱҥал.
Заседаний пытымеке, Александр Евстифеев журналист-влак дене мутланымыж годым тыге палемдыш:
— Ме врач, вуйлатыше да шке пашаштышт менеджер-влакым колыштна. Ынде келшен толшо опытым кучылташ гына кодеш. Тиде йодыш деке нылымше кварталыште угыч пӧртылына да правительствын заседанийыштыже доклад-влакым колыштына. Йодышлам кузе рашемдымым эскераш тӱҥалына.
Любовь Камалетдинова.