ЭРТЫШ ИЛЫШ ДА КРАЕВЕДЕНИЙ

Сарын кышаже

Ӱдырамаш-влакын полышышт

Кугу Отечественный сар жапыште кредалше-влакын веле огыл, тылыште тыршыше-шамычынат элнам аралымаште полышышт моткоч кугу лийын. Икте пасушто курал-ӱдымаште тыршен, весе – заводышто, кумшо вольыкым ончен… Эрден эр кынелын, шудым соленыт, лӱп шокшо игечыште пасушто шурным тўредыныт, южгунамже илалше еҥланат, ӱдырамашланат имне олмешат кычкалташышт логалын

Йошкар-Армийлан ӱдырамаш-шамычын полышышт нимучашдыме лийын. Нуно тӱрлӧ патриотический пашашт дене ойыртемалтыныт. Военный госпитальыште тыршеныт, боец-влаклан сарыш пӧлекым, шокшо вургемым поген колтеныт.

1942 ий январьлан республкна гыч элнан обороно фондышкыжо 2 миллионат 193 тӱжем теҥге пурен. Тыгак облигацийым, киндым, шылым, саскам –  чылаже 2 миллионат 673 тӱжем теҥгеашым колтеныт.

Марий ӱдырамаш-влак оборонын фондышкыжо калык украшенийлан шотлалтше да тукым гыч тукымыш куснылшо шийым погеныт. Мутлан, тунам Сотнур районыш пурышо Кугу Корамас «Москва» колхозын комсомол  организаций секретарьже сомылым шуктышо Анна Покровскаят (снимкыште шолаште) тыгай пашаш ушнаш тӱҥалтышым ыштен. Тушманын Москвам налаш тєчымыж годым ик комсомол погынымаште Аня шке ӱмбачше ший окса гыч ыштыме сӧрастарышым пуэн. Аваж деч шарнымашеш кодшо ший окса  набор 53 теҥгеш шуын. Тыгодым тудо моло комсомолецымат ушнаш ӱжын. Тыге ты погынымаште тунам оборонын фондышкыжо 8 килограмм шийым погеныт.

Сотнур район «Москва» колхозын комсомолкыжо регионнан тӱрлӧ кундемысе ӱдырамашыж-влаклан пример лийын, вет тидын деч вара моло районлаштат ший оксам погены сдатленыт, тыге фронтлан полшеныт.

Е.ЭШКИНИНА

Опубликовать в Одноклассники

Добавить комментарий