«XXI курымын талантше-влак» – тиде Марий Элысе веле огыл, а пӱтынь Российысе талантан самырык ӱдыр-рвезе-влаклан кушкашышт полшышо проект.
Тудо ик ий ончыч Э.Сапаев лӱмеш опер да балет академический театрыште шочын. Икымше концертыште участник-влак мастарлыкышт дене чотак ӧрыктареныт ыле. Ончышо-шамыч кажныжым шокшын вашлийыныт.
Мастар икшыве-влак рӱдолаште кушкыт, шонат. Уке, нуно республикнан чыла гаяк районыштыжо улыт да кундемнан чапшым кӱшкӧ нӧлтат.
3 февральыште ты проектын кокымшо концертше лиеш. Тушто Марий Эл гыч Тимур Луговойын (фортепиано, Йошкар-Ола), Иван Швецовын (баян, Кужэҥер), Илья Алексеевын (аккордеон, Кужэҥер), Мария Оразаеван (скрипке, Йошкар-Ола), да Озаҥ ола гыч Алсу Валиахметова (орган)ден Азалия Ногманован (флейте) шоктымыштым аклаш лиеш. Нунын кокла гыч кажныже шке семӱзгарже дене мастарын шокта да Россий да тӱнямбал конкурслаште сеҥыше лийын.
А.БАЙКОВА
