«Марий Эл Республикысе муниципальный образований-влакын советышт» ассоциацийын правленийжын черетан заседанийже Советский районышто эртен.
Тудын пашашкыже Кугыжаныш Погын председательын икымше алмаштышыже Лариса Яковлева ден бюджет да экономике политике шотышто комитетын еҥже Дмитрий Глазырин ушненыт.
Район, муниципал да ола округлам вуйлатыше-влак Советский районын социально-экономически велым вияҥмыже, сеҥымашыже да ончыкылык планже, депутат коллегыштын пашашт дене палыме лийыныт, тыгак ассоциаций дене кылдалтше йодышлам лончыленыт.
Район администрацийын вуйлатышыже Евгений Пушкинын палемдымыж почеш, кызыт Советский кундемыште 25803 еҥ ила, 10 ялозанлык организаций, 9 кресаньык озанлык, 1 перерабатыватлыше предприятий пашам ыштат. 2024 ийыште район 7 национальный проектын кышкарыштыже регионысо 10 проектым илышыш пуртен.
Советский районынын вуйлатышыже Сергей Халтурин депутат-влак погынымашын пашаштыже тӱҥ направлений-влак нерген каласкален. Мутшо почеш, депутат-шамычын калык дене вашлийын мутланыме, районышто илыше-шамычын йодышлаштым решатлыме пашашт тӱҥлан шотлалтеш.
Заседаний деч вара чыланат Вятский селаште верланыше аграрно-строительный техникумыш, Советский посёлкысо Йоча усталык пӧртыш, йоча сымыктыш школыш да «Звезда» ФОК-ыш, Кужмарий ял шотан илемысе Юмын аван Казанский иконыжын святой памашышкыже миен коштыныт, «Нигӧ ок мондалт, нимо мондалтын огыл» обелиск воктеке пеледышым пыштеныт.
– Тыгай шотан паша моткоч пайдале, тудо ончыко каяш сай шӱкалтышым ышта. Ме верысе шкевиктемым вияҥдыме, кумдыкым сайынрак виктарыме кӱлешан йодышлам лончылышна, коллегына-влакын пашаштым аклышна да Советский районын вашталтмыжым шке шинча дене ужна. Мыланем тиде район пеш лишыл, вет лач тыште профессиональный пашамым тӱҥалынам. Программе моткоч поян ыле. Советский районысо верысе кучемын пашаж гыч эн сай опыт ден практикым моло муниципальный образованийланат темлаш кӱлеш шонем, – заседанийым иктешлен Лариса Яковлева.
Маргарита ИВАНОВА
Марий Эл Кугыжаныш Погынын пресс-службыжын фотожо.
