Кугыжаныш Кремль дворецыште «Кадры» национальный проект кышкарыште эртыше «Профессий шот дене эн сай» Россий кӱкшытан конкурсышто сеҥыше-влаклан наградым кучыктымо.
Сеҥыше да лауреат-влакым саламлаш федерал кучемын еҥже-влак, тидын шотыштак Россий правительствын вице-премьерже Татьяна Голикова, паша да социально аралтыш министр Антон Котяков толыныт. Сеҥыше-влаклан наградым 20 профессионал номинаций дене кучыктымо.
Торжественный мероприятийыш Марий Эл гычат делегаций миен. Тудын радамыштыже Марий Элын паша да социально аралтыш министр Елена Таникова, министрын алмаштышыже Александр Лазарев лийыныт.
Конкурсын призержо-влак радамыште – Марий Эл гыч «Поволжье» биогенетический рӱдерын зоотехник-консультантше Любовь Игнатьева. Тудо «Эн сай зоотехник» номинацийыште Российыште кумшо верыш лектын. Сулен налме наградым, окса премийым, россий ялозанлык министр Оксана Лут кучыктен.
Снимкыште: наградым кучыктымо годым.
Фотом Марий Эл Республикын Паша да социально аралтыш министертвыжын воткыл лаштыкше гыч налме.
