Марий Эл вуйлатыше дене вашлиймаште республикыште самырык-влакын политикыштым вияҥдыме концепцийым илышыш пуртымо нерген мутланеныт.
Мутланымаште Марий Эл Правительстве председательын икымше алмаштышыже Сергей Сметанин да республикын самырык-влакын политикышт, спорт да туризм министрын алмаштышыже Юрий Баскаков лийыныт, палдара Марий Эл Республик вуйлатышын организаций-аналитике виктемже.
Александр Евстифеев Марий Элыште эртарыме «Ончыко да кӱшкӧ!» икымше республиканский молодежный форум нерген ушешетарен.
— Самырык-влакын форумыштышт кӱлешан икмыняр ойым пидме. Ик направленийже ӱдыр-рвезе-влакын канышышт да икте-весышт дене кылым ыштыме дене кылдалтын – тиде райрӱдыштӧ веле огыл, районлаштат тыгай сынан тӱрлӧ мероприятийым эртарымаш, — каласен республик вуйлатыше.
Юрий Баскаков палемден: регионын рӱдолаштыже форумын сайын эртымыжым шотыш налын, кызыт ведомствышто тыгай сынан мероприятийым Марий Элын районлаштыже эртарышаш йодыш шотышто паша ышталтеш. Тыгай вашлиймаш-влак самырык тукым ден тӱрлӧ кӱкшытан кучемлан икте-весыштым колаш, пырля тыршен, республикым самырык-влаклан шкеныштым илышыште муаш да шке кундемышт дене кугешнаш лийме кумдыкыш савыраш полшат.
— Икмыняр район деч кызытак темлымаш-влак улыт. Тылзе мучаш марте тиде йодыш шотышто паша ышталт шукталтеш да ончаш темлалтеш, — ешарен Сергей Сметанин.
Вашлиймашын участникше-влак самырык-влакын мероприятийыштым лачшымак кузе, могай формат дене эртараш лиймым каҥашеныт. Тиддеч посна молодежный туризм, таза илыш-йӱлам шыҥдарыме, самырык-влакын фестивальыштым эртарыме йодыш-влакым нӧлталыныт. Нуно ончыкыжым регионышто молодежный политикым вияҥдыме шотышто опыт дене пайлалташ сай площадке лийын кертыт манын палемденыт.
Л.Камалетдинова.
