УВЕР ЙОГЫН

Кыл пеҥгыдырак, корно «кӱчыкрак» лийшаш

Мер илыш

Кыл пеҥгыдырак, корно «кӱчыкрак» лийшаш

Январь мучаште Марий Элысе Мер-политик рӱдерыште республикысе национальный коммерческий огыл мер организаций-влакым вуйлатыше-шамычлан йыргешке ӱстел эртен.

Ӱмаште декабрь мучаште республикыштына «Российысе калык-влакын ассамблейышт» общероссийский мер-кугыжаныш организацийын марий региональный пӧлкаже ышталтын. Российыште у форман мер организаций Россий президент В.Путинын указше дене пеҥгыдемдалтын. Ассамлейын пашаже, тудын ойыртемже нерген регионысо пӧлкам вуйлатыше Л.Яковлева каласкален. Организаций чумыр российысе гражданский идентичностьым да калык кокласе келшымашым арален кодымым пеҥгыдемдаш ышталтын. Ассамблейын учредительже-влак радамыште Национальность-влак паша шотышто федеральный агентстве (ФАДН), «Российысе калык-влакын ассамблейышт» общероссийский мер организаций, Российысе финн-угор калык-влак ассоциаций  (АФУН) да Россий Федерацийысе Йӱдвел, Сибирь да Мӱндыр Эрвел шагал чотан тӱп калык-влак ассоциацийышт улыт.

Лишыл жапыште ассамблейын  погынжо эртышаш. А 2 февральыште Москваште ты ассамблейн председательже В.Васильев (Кугыжаныш Думышто «Единый Россий» партийын фракцийжым вуйлатыше) Российысе федеральный калыкле-тӱвыра автономий вуйлатыше-влак дене вашлийын. Тушто Российысе марий-влакын ФНКА-штын советшым вуйлатыше Л.Якловлеват лийын.

Ушештарена, ассамблейын регионысо пӧлкажын вуйверышкыже Марий Элысе руш, марий, татар, азербайджан да «Калык-влакын келшымашышт» мер организаций-влакын еҥышт сайлалтыныт.

Вашлиймаште Марий Эл правительстве вуйлатышын икымше алмаштышыже М.Васютин мер да кугыжаныш форман ассамблейын тачысе пагатыште кӱлешлыкшым рашемден, мер организаций ден кугыжаныш коклаште кыл пеҥгыдырак, икте-весе деке корно «кӱчыкрак» лиеш манын палемден.

Марий Элын тӱвыра, савыктыш да калык-влак паша шотышто министрын алмаштышыже И.Садовин республикыштына «Марий Элын кугыжаныш национальный политикыже» кугыжаныш программын кузерак шукталтмыж дене палдарен.

С.Пехметова

Авторын фотожо

Опубликовать в Одноклассники

Добавить комментарий