СЫЛНЫМУТ УВЕР ЙОГЫН

Кайык семынак айдемыланат кӱлеш шулдыр

Марий Элын сулло журналистше, поэт Юрий Григорьевын «Илыш шулдыр» у савыктышыже марий лудшын книга шӧрлыкыштыжо шинчалан вик перныме лукышто верым муэш, шонена.

Книгам почын, лудаш тӱҥалат – кидет гыч мучыштарымет ок шу: почеламутшат, очерк ден шарнымаш статьяже-шамычат ик шӱлыш дене лудалтыт. Ондакак возымо, но савыкталтдыме сылнымут аршашыже-влак чонеш логалыт. Поэт саман, йӧратымаш, илыш, йолташ нерген умылымашым шке шинчаончалтышыж гоч почын пуа:

Мом шонаш, мом шорташ, ойгыраш,

Чылалан – ик Сандалык, ик Мланде.

Неле ойгым ужмек, тудын деч ойырлаш

Ыле йӧсӧ, а ынде мондалте…

Мом шонаш, мом шорташ, ойыраш… – воза ик почеламутыштыжо.

Книга чоҥалтме радамым ончалаш гын, тудым лудаш каньыле лийже манын келыштарыме. «Автор деч» манын палемдыме ончылмутышто да «Мыйын университетем» статьяштыже (33-39-ше лашт.) Юрий Григорьев шкенжын илышыже, усталык корныжо нерген воза. Тематике я жанр дене ушалтше почеламут-влак подборкын тӱҥ шонымашыжым посна статья почын пуа. Мутлан, йоча-влаклан пӧлеклалтше почеламут аршаш («Онар тукым улына» муро, «Йытыр», «Йолыштемже – портышкем», «Велосипед», «Изи морж» почеламут-влак) деч ончыч автор «Ямде лий» газет редакцийыште пашам ыштымыжым шарналта; «Да кенеташте утыр сайын почеламут чымалт лектеш» вуймутан статьяште кусарыме паша нерген шонкалымашыж дене палдара, шкенжым поэт-кусарышылан ок шотло гынат, В.Высоцкий, М.Цветаева, Н.Рубцов, М.Лермонтов, Г.Зенцов семын возымо почеламутшо-влак шӱмеш возыт; «Мондалтше ял» почеламутын, «Пиал дек корно» балладын пӱрымашышт нерген – посна шарнымаш-влак .

Лудшына-влак палат, Юрий Григорьев поэт веле огыл, тале да уста журналист. «Кугарня», «Марий Эл» газет редакцийлаште ыштымыж годым тудын серыме материалже-влак кӱкшын аклалтыныт. У книгашке пурышо «Кутлин ден Тыгыде Морко нерген – пагален…», «Илыш, чынжымак, ала шарнымашан киноленте дене иктак?..» «Ала шкеж нергенак серен?» очеркше-влак марий сылнымутын шурнывечыжым туто пырче дене пойдарыме дене иктак. Туге возен моштен – лудат да чылажат шинча ончылнет сӱретлалтеш, а мут ярымже икте-весышт дене туге пуналтыныт – ик мутшымат, ик ойжымат йомдарыме ок шу!

«Чонпатыр» ик актан сем йомакше тачысе кечыланат моткоч келшен толеш. Тыште Юрий Григорьев поэт да мурызо, мурым возышо, йомакче семын Осал ден Порылык кокласе ваш кучедалмашым почын ончыкта. Ош тӱняште порылыклан ӱшан, илышым да икте-весым пагалымаш, чын йӧратымаш гына чыла тӧрсырым, осалым сеҥат – автор шкежат тиде шонымашлан ӱшанен ила.

Ала айдемын чонжо – ойгышто, куаныште?

Ала лач тиде порылык гына?

Ала лач полыш кидым шуйымаште

Айдеме чонын койыш палдырна? – «Айдеме чон» почеламутышто шындыме йодышыжлан автор шкежак вашешта:

– У сылнымут сборникем арам огыл «Илыш шулдыр» манын лӱмдышым. Мыйын почеламутлаштем тиде ойсавыртыш чӱчкыдынак кучылталтеш. Чоныштет шулдырым шижат гын, илышат пиалан!

Книгам Марий Эл Республикын тӱвыра, печать да калык-влак паша шотышто министертсвын полшымыж дене «Марий Эл» газет ООО савыктен луктын.

 

Л.СЕМЕНОВА

Опубликовать в Одноклассники

Добавить комментарий