25 апрельыште Юл кундем федерал округышто Кугу Отечественный сарыште сеҥымылан 75 ий темме лӱмеш кугу акций тӱҥалын.
«Мемнан сеҥымаш кечына» акций Россий президентын Юл кундем федерал округысо полномочный представительжын аппаратшын темлымыж почеш эртаралтеш. Муро марафон регионыштына илыше-влакым ик калык коллективыш чумыра. Регион-участник-влак ик эн кумдан палыме «День Победы» мурым мурат да эстафетым икте-весылан пуат. Ты мурым так огыл ойырымо, тудын гоч автор-влак (композитор Давид Тухманов ден поэт Владимир Харитонов) калыкын кугу подвигшым, лишыл еҥ-влакын чон корштымым, элыштына илыше да мемнан тыныс илыш верч миллион дене еҥын лӱддымын да геройлын шогымыштым ончыктат. Кугу пайремын гимнышкыже савырныше тиде мурынат – тений юбилейже. Икымше гана тудо лач 45 ий ончыч калыкыште йоҥгалтын.
«Мемнан Сеҥымаш кечына» марафон февраль тӱҥалтыште Мордовий республикыште тӱҥалтышым налын. «День Победы» мурым Саранскысе да муниципальный районласе эн сай усталык коллективше, сулло артистше, волонтёр ден патриотизм шӱлышан ушем-шамычын еҥже-влак муреныт. 25 апрельыште ты эстафетым нуно шке пошкудыштлан, Юл кундем федерал округысо регион-влаклан, пуэныт.
– Патриотизм шӱлышан калык акцийым «День Победы» мурым руш, мокша да эрзя йылме дене мурен почына. Мордовий фронтыш 246 тӱжем утла ӱдыр ден эргым ужатен. Нунын кокла гыч кажне кокымшыжо мӧҥгыжӧ пӧртылын огыл. Сеҥымаш нерген мурыза, тудын нерген каласкалыза. Национальный республик-влаклан тиде чапланыше мурын куплетшым шке шочмо йылмышт дене мураш темлена. Меат лач тыге ыштенна. Кугу Отечественный сарыште налме сеҥымашна – чылалан икте», — палемден Мордовий Республикысе «Волонтёры Победы» всероссийский мер толкынын регионысо пӧлкажым вуйлатыше Ярослава Завалихина.
Юл кундем федерал округысо регионлаште усталык коллектив-влакын выступленийыштым февральыште да март тӱҥалтыште, Российыште коронавирус инфекций шарлен кертмым шагалемдаш манын утларак ямде улмо да мӧҥысӧ самоизоляцийыште шинчыманак манме режимым увертарыме деч ончыч возен кодымо. А кызыт, вирус шарлен кертме лӱдыкшӧ жапыште, йӧратыме мурым Юл кундем федерал округысо калык-влакын йылмышт дене йоҥгалтарыме поснак чоныш логалшаш.
Республикласе да областьласе творческий коллектив-влакын мурышт 25 апрель гыч 8 май марте верысе телеканаллаште транслироватлалтыт. Акцийыш кажне кечын вес регион ушна. А Сеҥымаш кечын, 9 майыште, кумдан чапланыше
мурым марафоныш ушнышо чыла музыкальный коллектив мураш тӱҥалеш. Тыгак муро-влакым соцсетьлаште да ютюбышто #песнипобедыПФО #нашденьпобеды хэштег-влак дене муаш лиеш. Радиостанийлаштат тиде муро йоҥгалтеш.
«Мемнан сеҥымаш кечына» муро марафон мемнам, Юл кундем федерал округышто илыше-влакым, Шарнымаш да чап идалыкыште, Кугу Отечественный сарыште сеҥымылан 75 ий темме идалыкыште иктыш чумыра.
А.БАЙКОВА
