21 январьыште Мордовий Республик Зубово-Полянский район Покровские Селища селаште Тӱвыра пӧрт почылтын. Тудо «Тӱвыра» национал проект кышкарыште ышталтын.
Мероприятийыш Мордовий вуйлатыше Артём Здунов ден Тӱвыра, национал политике да архив паша министр Светлана Баулина толыныт. Нуно погынышо-влакым ты кече дене саламленыт да сай лектышым тыланеныт.
– Тӱвыра пӧрт мемнан селаште да лишыл яллаште иканат лийын огыл. Садлан ты тӧнежым почмаш – мыланна кугу пайрем.
Ала тыгай изи илемлан клуб огеш кӱл манмат шоктен. Вет самырык-влак шочмо кундемышт деч тораште улыт. Но шукынжо у тӧнежын пашаже тӱвыргӧ лектышан лиеш манын ӱшанат да тидлан уло вийыштым пуаш ямде улыт. Вет ынде клубын ончыкылыкшо – верысе калыкын кидыштыже.
Кызыт паша тӱҥалеш веле. Лишыл жапыште, сылне сем почеш тавалташ манын, дискотекым эртараш тӱҥалыт, кружок-влакат почылтыт. Кажне толшо тушто шкалан келшыше сомылым муэш, – палемден ты селаште шочын-кушшо ӱдыр Оксана Белкина.
Покровские Селища селаште вичшӱдӧ наре еҥ ила, тӱҥ школ пашам ышта. У тӱвыра пӧрт каныш кечым але пайремым веселан эртараш йӧнан вер. Концерт залжым шӱдӧ еҥлан келыштареныт. Тыгак тушко книгагудым кусареныт, усталык кружоклам эртараш пӧлемлам ямдыленыт.
– Мемнан коллективлан 13 ий. Ынде репетицийым эртараш верна уло. Тидлан моткоч куаненна.
Ме район да республик кӱкшытыштӧ эртаралтше мероприятийлаш чӱчкыдын ушнена. Икмынярынже пенсийыш лектынна гынат, чулым улына. Самырык-влак денат пашам ыштена, – палдарен «Ляйня» ансамбльын ик участникше Светлана.
О.МОШКИНА
