МАЙАТУЛ

Ик пушегын укшыжо улына

Финн-угор калык-влакын кечышт кышкарыште республик мучко тӱрлӧ мероприятий эртаралтеш. Теве «ВийАр» тӱвыра кокласе кыл ушем» мер организацийын председательже Алёна Иванова ден «Эрвий» йоча ушемын вуйлатышыже Маргарита Маланова 27 октябрьыште черетан вашлиймашым эртареныт. Ты гана нуно Калыкле сымыктыш гимназийыште кандашымше ден индешымше класслаште тунемше-влакым чумыреныт.

Финн-угор тӱшкаш мыняр калык пура? Нунын ойыртемышт могай? Ты теме дене кылдалтше могай кугу проект илышыш шыҥдаралтеш? Тиде да моло йодыш-шамычлан вашмутым Алёна Иванова пуэн. А йоча-влакын пален налме шинчымашыштым квиз модмаште терген.

Ик кугу проект семын финн-угор калык-влакын йоча лагерьыштым палемдаш лиеш. Тудо ынде 20 ий утла эртаралтеш. Теве 2019 ийыште ты мероприятий Национальный президент школ-интернатыште (кызыт Калыкле сымыктыш гимназий) лийын. Тудым шарналташ манын, Маргарита Маланова фильмым ончыктен.

Умбакыже тунемше-влак, кок командылан пайлалтын, модмашке вашкеныт. Ик вереже нуно ваштареш шогалыныт да мо дене икгай койыт, мо дене уке – рашемденыт. Ме кажныже тӱжвал сынна, чийыме вургемна дене ойыртемалтына. Тыгодымак ик тунемме тӧнежыште вашлийынна, ик республикыште илена. Иктаж тораш каена гын, чылан марий, финн-угор улына. Садлан тӱҥ задачына – шке тӱвыранам палаш, йылмынам аклаш да вес калык-влакымат пагалаш.

Вес модмашыже тренинг сынан ыле. Тушто кажныжлан грецкий пӱкшым пуэденыт. Вара тудым тӱткын шымлаш да жаплан пырляшке пышташ темленыт. Умбакыже кажне йоча кидыште кучымыжым моло коклаште мушаш ыле. Ты модмаш молан туныктен шонеда? Йоча-влак пӱкшым «мыйын» манаш тӱҥалыныт. Кеч-мо да кеч-кӧ чонлан лишыл лийже манын, тудым тӱрлӧ могыр гыч ончыман. Тӱвыра нерген ойлымо годымат тыгак: умылыдымо гай чучеш гын, тудым сайынрак пален налаш тыршыза.

 

О.МОШКИНА

Опубликовать в Одноклассники

Добавить комментарий