Композитор, фронтовик, СССР Кугыжаныш да Ленинский премий лауреат Андрей Яковлевич Эшпайын шочмыжлан – 100 ий
Чапланыше семмастарым Россий мучко веле огыл, йот эллаштат сайын палат. Тудын возен кодымо музыкшо тӱня мучко кумдан шарлен.
Марий кундемыште Андрей Эшпайым моткоч порын шарнат да тудын дене кугешнат. Йошкар-Олашке толмыж еда землякна И.С.Палантай лӱмеш тӱвыра да сымыктыш колледжыште кугу вашлиймашым эртарен, тусо оркестр дене шуко концертым пуэн, сымыктыш аланыште мастарлыкым шуарыше ӱдыр-рвезе-влак дене музык нерген чон почын мутланен.
Колледжын тӱҥалтышыж почеш эртарыме «Марий Элын самырык талантше-влак» конкурсын жюри еҥже лиймыж дене шуко самырык музыкантлан сымыктыш тӱняш корным почын. Тудын надыржым шотыш налын, ты конкурс 2013 ий гыч Андрей Эшпайын лӱмжым нумалеш да Российын тӱрлӧ кундемже гыч талантан самырык ӱдыр-рвезе-влакым ик верыш чумыра.
Андрей Яковлевич Марий Элыш толаш моткоч йӧратен. Звенигово районысо Какшамарий кундемыш эреак миен коштын. А тушто лиймекыже, Мариинский Посадышкат (Шӱндыр) пурен лекде каен огыл. Кугу Какшанын пурла серыштыже тудын аваже шочын, а шолаштыже – ачаже. Сандене Андрей Яковлевичлан Марпосад ден Какшамарий эн шерге лийыныт.
Андрей Эшпайым шарныме лӱмеш шочмо кечыж вашеш республикна мучко ятыр мероприятий эрта. Мутлан, С.Г.Чавайн лӱмеш национальный книгагудышто 8-15 майыште Эшпайлан пӧлеклалтше кече-влак лийыныт. «Андрею Эшпаю посвящается…» сылнымут-сылнысем программыште композиторын илыш-корныж гыч оҥай факт-влак дене палдареныт, документ негызеш ямдылыме кинохронике гыч ужаш-влакым ончыктеныт, а эн кугу тӱткыш, мутат уке, тудын музыкшылан ойыралтын.
Теҥгече Козьмодемьянск олаште, Андрей Эшпай лӱмеш саклымверыште, «Песня о Родине!» фестиваль-конкурс ятыр участникым чумырен. Пайремыш погынышо-влаклан тыгак «Угадай мелодию» конкурс программе, тӱрлӧ акций эртеныт, «Война и музыка» фильмым ончыктеныт.
Какшамарий кундемыште верысе сымыктыш школ «Вӱдшӧ йога…» фестивальым тений кумшо гана эртара. Ты гана тудо 14 июньышто лийшаш.
– Андрей Эшпай – марий калыкнан ушан-шотан, талантан эргыже. Мемнан школышто пытартыш гана школ кудывечыштына ачажлан памятникым почмо годым лийын. Тунам фестивальнам кокымшо гана эртаренна. Андрей Яковлевич туныктышо, тунемше да музыкым йӧратыше-влак дене вашлийын. Какшамарийыш толмекыже, Галина Алексеевна Ишпайкина деке пурыде каен огыл. Нуно ик жапыштырак шочыныт, тукым шольо-шӱжар лийыныт, – палдара Какшамарий йоча сымыктыш школ вуйлатыше Надежда Акреева. – Тений Андрей Яковлевичын шочмыжлан – 100, а ачаже Яков Андреевичын шочмыжлан – 135 ий. Тидым шотыш налын, тенийысе фестивальна Эшпаймытлан пӧлеклалтеш.
Алевтина БАЙКОВА
Михаил Скобелевын фотожо
