КУЛЬТУР ДА ИСКУССТВО СЫМЫКТЫШ

Вӱдшӧ йога, серже кодеш. Шкеже уке, а шарнымаш ила… (умбакыже)

(Тӱҥалтышыже 32-шо №-ан газетыште)

Шарнымаш сорта

Вашлиймаште Прасковья Андреевна Ишпайкинан ашнаш налме Иван эргыжын Вера ӱдыржӧ лийын.

Шукерте огыл тиде фотокартычке (кӱшыл фото) кидышкем логале. Тыште – Яков Эшпайын акаж ден шӱжарже, Ольга ден Прасковья. Ковам, Прасковья Андреевна, мыйын ачайым нужна еш гыч ик ияшым конден. Тудын 8 ияш эргыже лийын, но шодыжо пуалме чер деч вара колен улмаш. Сандене Иван Ишпайкиным налын да шкенжын эргыж семын ончен-куштен. Кушкын шумекыже Андрей Эшпай дене пырля модын куржталыштыныт, эҥерыште йӱштылыныт, сава дене йолжым пӱчкын колтымо нерген ойлымыжымат шарнем, – чонжым почеш Я.Эшпайын тукым уныкаже, Вера Ивановна Ильюшкина (Ишпайкина). – Ачамын ойлымыж почеш, мӧҥгыштӧ пырдыжыште кӱсле кечен. Тудын дене ковам шоктен, маныт, но тидым мый ом шарне. Но кидыште кӱслем кучен войзалтме фотокартычкыжым ужынам. Ковамын ачажат ты семӱзгарым сайын шоктен, но ачамын кӱслем шоктымыжым ом шарне.

Ольга – Яков Эшпайын шӱжарже. Тудо марлан каен огыл, самырыкнекак ош тӱня дене чеверласен: кӱдырчӧ рашкалтен, маныт.

Шарнем, икана иктаж икымше классыште тунеммем годым, Яков Эшпай мемнан деке унала толын. Мыланна эреак пӧлекым, тамле кампеткам конда ыле. А Яков Эшпайын уке лиймекыже, пелашыже мыланна ялыш кок кугу посылкым колтен, иктышкыже кампеткым, печеньым оптен, а весышкыже – вургемым, вакшыш шартышым монь. Мемнан нужнан илымынам тудо пален.

Андрей Эшпайжын толмыж нерген шукырак шарнем. Школышто тунеммем годым икымше гана мемнан деке толмыжым ужынам. Ачам дене, окнаш ончен-ончен, чот кужун мутланеныт.

Шарнем, мемнан илыме пӧртым Прасковья Андреевна тоштерлан пуынеже ыле. Ме вич йоча кушкынна да илаш вер шыгырын чучын, сандене ачай нур велне вес пӧртым чоҥен. Саде пӧртнам, икмыняр жап шинчымеке, ачай ужален колтен, икшыве-влакым пукшаш-йӱкташ кӱлын вет.

Весымат сайын шарнен кодынам. Фермыште ыштыме годым школын лӱмгече пайремышкыже Андрей Эшпай толын ыле. Паша деч вара мыят пайремыш миенам. Лач тушто Андрей Эшпай мылам ачаж нерген книгам пӧлеклыш да ик лаштыкышкыже тыге сералтыш: «14.12.95. Дорогой Верочке с любовью. А.Эшпай». Тиде книгам моткоч перегем…

… УМБАКЫЖЕ 21 МАЙЫСЕ ГАЗЕТЫШТЕ ЛУДАШ ТЕМЛЕНА…

А.БАЙКОВА

Авторын фоторепродукцийже

Опубликовать в Одноклассники

Добавить комментарий