Э.Сапаев лӱмеш опер да балет театрыште чапланыше руш балерине Галина Уланова лӱмеш XXXII балет фестиваль почылтын.
Пайрем шӱлышан мероприятийыш Марий Эл вуйлатыше Юрий Зайцев миен коштын.
«Тынар ий жапыште марий балет регионын визитный картычкыже лийын. Тудым Российыштат да йот эллаштат сайын палат. Ты фестиваль тӱвыра мероприятий-влак кокла гыч ик эн кӱлешан верым айла, – палемден Юрий Зайцев.
Сценыште элнан ятыр олаж гыч веле огыл, тӱнямбал кӱкшытан шӱдыр-влакат мастарлыкым ончыктеныт. Теният ты йӱла умбакыже шуйна. Ты гана фестивальыште Большой театр гыч вич артист толын. Спектакльлаште тыгак эше Мариинский, «Кремлевский балет», М.И.Глинка лӱмеш Челябинск оласе опер да балет театрла гыч прима ден премьер-влак кушташ тӱҥалыт.
Фестивальын унаже – «Донбасс» мурышо да куштышо кугыжаныш академический сулло ансамбль.
Индеш кечыште театрын сценыштыже эн сай коллектив-влак мастарлыкым ончыктат, тыгак кумдан палыме артист ден хореограф-влак тӱрлӧ мастер-классым, вашлиймашым эртарат.
Марий Эл вуйлатышын пресс-службыжын
уверже негызеш Алевтина БАЙКОВА ямдылен
Денис Речкинын фотожо
