Шем теҥыз воктене – «Кугу гастроль»   

23 июль гыч Сочи оласе Телымсе театрыште Эрик Сапаев лӱмеш Марий кугыжаныш академический опер да балет театрын «Кугу гастрольжо» тӱҥалеш.

Шымше кеҥеж почела мемнан артист-влак курорт кундемын тӱвыра илышыжым сӧрастарат. Программыш ныл балет шедеврым пуртымо, тиде «Лебединое озеро», «Щелкунчик» (П.Чайковский), «Ромео и Джульетта», «Золушка» (С.Прокофьев). Нине лӱм-влак  Российын сулло артистше, театрын художественный вуйлатышыже Константин Ивановын вуйлатымыж почеш вийым налше марий балет школын россий да тӱнямбал сценыште чапланымыжым пеҥгыдемдат.

Тенийысе гастрольын географийже молгунамсе деч кумда. Телымсе театрыште мастарлыкым ончыктымо деч вара артист-влак Шем теҥыз сер мучко кугу турыш тарванат. 28 июльышто нуно Геленджик олаште «Ромео и Джульетта» балетым ончыктат, 29 июльышто Новороссийскыште – Золушкам», 30 июльышто Анапа олаште – «Ромео и Джульеттам». Нине ола-влаклан марий труппын выступленийже-влак событийлан шотлалтыт, молан манаш гын кечывалвел курортлаште кугу кӱкшытан классический балетым ончаш йӧн шагал годым лиеш. А кунам Телымсе театрын сценыж гыч Пётр Чайковскийын шедеврже йоҥга да уло зал, шогалын, совым кыра – уло Марий Эл верч кугешнымаш лектеш. Мемнан балет республикнан визитный картычкышкыже савырнен. Китайын, Мексикын, ОАЭ-н сценылаштыже мастарлыкым ончыктышыла, марий балет школ кӱкшӧ искусствын чекше уке манмым пенгыдемда

Гастроль Россий Федерацийын Тӱвыра министерствыжын всероссийский гастроль-концерт планже кышкарыште «РОСКОНЦЕРТ» ФГБУК-ын полшымыж дене эрта.

Г.Кожевникова

Фотом Марий Эл Тӱвыра, савыктыш да калык-влакын пашашт шотышто министерствын соцкылысе лаштыкше гыч налме.