Россий Федерацийын Кугыжаныш Думыжын вице-спикерже ден Марий Элым вуйлатышын пашажым жаплан шуктышо Донбассыште илыше-шамычлан гуманитарный полышым погымаште участвоватлыше чолга еҥ-влакым палемденыт.
18 июльышто Марий Элым вуйлатышын пашажым жаплан шуктышо Юрий Зайцев ден Россий Федераций Федеральный Погынымашын Кугыжаныш Погынжын председательжым алмаштыше Анна Кузнецова Донецк ден Луганск калык республиклаште илыше-влаклан гуманитарный полышым погымо пунктышто лийыныт.
Йошкар-Оласе Самырык-влакын полатыштышт верланыше пунктыш палемдыме полышым регионнан чыла районжо гыч кондат. Спецопераций тӱҥалме деч вара Марий Эл правительстве велым кочкыш сату ден чоҥымо материалым оптыман уже индеш машинам колтымо. Тылеч посна республикысе амалкалче ден ветеран организаций-влакат сайын полшат.
Кызыт Добровольчествылан полшымо ресурс рӱдерыште школышто шинчымашым погашлан да йоча усталыклан тӱрлӧ арверым погат. Сентябрьыште пӧрт леведышлан материалым колташ ямдылалтыт. А.Кузнецова ден Ю.Зайцев Донбассыште илыше йоча-шамычлан книга ден школ арверым коденыт.
«Кушто неле, кушто мемнан полышна кӱлеш, полшыде кодаш правана уке. Мый тыгеракын республик лӱм денат, акцийлашке ушнышо мемнан еҥна-влак лӱм денат ойлем. Анна Юрьевналан уло чонем дене тауштем, молан манаш гын тудо Донецк да Луганск кундемлаште, моло вереат уже лийын. Тиде акцийыш кумылын ушнем. Регионысо калык кызыт канцеляр сатум пога, 60 тонн продуктым уже пуэн, чоҥымо материалымат колтен. Волонтёр, полышым погышо, тыгак шканжат уто огыл арверым чаманыде кондышо-шамычлан уло чонем дене тауштем», – манын Ю.Зайцев да Донбассыште илыше калыклан ончыкыжым эшеат кугун полшаш тыланен.
Тауштымо мутым А.Кузнецоват ойлен да палемден: «Шукертак тыге лийын: руш айдеме полша веле огыл, пытартышыжым пуа. Тудо изираклан, вийдымыраклан, лушкыдыраклан эреак полшаш ямде. Тиде ала-мо тугай ӧрыктарыше огыл, тиде тыгак лийшаш. Регионласе калыкат указ але кӱштымаш почеш огеш полшо – тиде тудын кумылжо. Донбассыште илыше-влаклан мыланна тыглайла чучшо тӱрлӧ арвер моткочак огыт сите. Мутлан, руш йылме дене возымо йоча книга, тыгак кочкыш продукт, медикамент, моло проста ӱзгар. Таче ме икте-весылан кӱлмынам эн чот умылена – тиде эн тӱҥ».
Кугыжаныш Думын вице-спикерже военный спецоперацийыште Марий Эл гыч шуко геройын участвоватлымыже, Донбассыште илыше-влакын интересыштым арален, вуйым пыштымыж нергенат ойлен.
«Юрий Викторович специальный военный операцийын геройжо-влакын лӱмыштым курым гыч курымыш шарнаш тӱҥалме шотышто паша радамже дене палдарыш. Нунын лӱмыштым школ-влаклан пуаш кӱлеш, нунын нерген воктен илыше-шамыч палышаш улыт. Таче, XXI курымышто, гаджет да социальный кыл-влак дене пайдаланыме жапыште, калык шке илышыжым чаманыде кредалеш – тиде шукым ӧрыктара, вет тымарте чыла подвигым ондак гына ыштыме манын шонымо. Но икте-весылан, шочмо эллан полшышо, шке шонымаш ден поянлыкым аклыше еҥ-влак йомын огытыл», – манын А.Кузнецова.
Марий Элым вуйлатышын пашажым жаплан шуктышо Ю.Зайцевын палемдымыж почеш, гуманитарный полышым погымо пашам поснак у тунемме ий лишемме вашеш утыр да утыр вияҥдаш тӱҥалыт.
А.Кузнецова Донец да Луганск калык республиклаште илыше-влаклан гуманитарный полышым поген колтымаште чолган участвоватлыше-шамычым: «Бикам» ООО-н директоржо Марат Биктемировым, «Клен» ООО-н директоржо Геннадий Дворецкийым, ший волонтёр, пенсионер Тамара Тарасовам, «Акашевский» чыве фабрике» ООО-н социальный вияҥмаш да корпоративный паша пӧлкажын менеджерже Нурия Обуховам «Единый Россий» Всероссийский политический партийын Генеральный советшын секретарьжын алмаштышыжын Таумутшо дене палемден.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
