Йошкар-Оласе 4-ше №-ан поликлиникым лишыл кок ийыште тичмашнек олмыктат.
Таче кечылан тиде медицине тӧнежыште «Здравоохраненийын первичный звеножым модернизироватлымаш» регионысо проект кышкарыште леведышым олмыктымо, чыла окнам, подвалыште вӱдым висыме узелым да фасадым вентилироватлыме устройствым вашталтыме. Олмыктымо пашан акше 25 миллион теҥгеш шуын.
9 сентябрьыште Марий Элым вуйлатышын пашажым жаплан шуктышо Юрий Зайцев шуктымо пашан качествыжым терген да помещений кӧргым олмыктымо шотышто ончыкылык планым рашемден.
Тазалыкым аралыме министр Марина Панькован увертарымыж почеш, поликлиникым лишыл кок ийыште тичмашнек олмыктат, тыгодым пациент-влаклан медицине полышым налаш нимогай чарак огеш лий.
Йошкар-Оласе 4-ше №-ан поликлинике 40 ий утла пашам ышта, ты жапыште тудым капитально ик ганат олмыктымо огыл.
Олмыктымо деч посна медицине тӧнежыш эше у оборудованийым налыт. Кызыт цифровой рентген аппаратым шындаш помещенийым ямдылат.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
