ЙОШКАР-ОЛА КУЧЕМЫШТЕ УВЕР ЙОГЫН

Оласе кудывечылаште – сай вашталтыш

Йошкар-Оласе кудывечылам олмыкташ эше 70 миллион теҥгем ешарен ойырымо. Тидын нерген Марий Эл вуйлатышын пашажым жаплан шуктышо Юрий Зайцев оперативный совещанийыште увертарен.

Олан мэрже Евгений Масловын мутшо почеш, пытартыш 40 ий жапыште рӱдолан кудывечылажым шотыш кондымо паша йӧршын ӧрдыжеш кодын, а кызыт тудо шолеш. «Вашталтышым ужын, еҥ-влак йодышым утларак пуэдат, ты паша умбакыже шуйна мо манын палынешт. Чумыржо 140 миллион теҥге ойыралтын. Тугеже, чыланат ужыт, олмыктымо паша тачысе дене чарнен ок шогал, шот-радам дене шукталтеш», – каласен тудо. Мэрын палемдымыж почешак, олмыктышашлык кудывечым ойырымо годым илыме пӧрт воктене социальный тӧнежла улмым, еҥ-влак чотым, кудывече аварий лӱдыкшан але укем да молымат ончат.

Марий Эл правительствым вуйлатышын икымше алмаштышыже Александр Сальников ешарен: «Кудывечылам Волжскышто, Козьмодемьянскыште, Медведевыште, Звениговышто да Йошкар-Олаште олмыктат. Кушто да мом эн ондак олмыктышашым муниципиал вауйлатыше-влак раш палат. Паша тӱҥалын. Окса кызытеш кагазыште веле, молан манаш гын торгым увертарыман да подрядчик-влакым ойырыман».

Марий Эл вуйлатышын пашажым жаплан шуктышо кудывечым ойырымо годым чылажымат шотыш налаш, еҥ-влаклан умылтараш, ойырымо оксам пайдалын кучылташ темлен. Республикысе шукырак еҥлан саемдыме верыште илаш йӧным ыштыман, палемден тудо.

Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен

Д.РЕЧКИНЫН фотожо

 

Опубликовать в Одноклассники

Добавить комментарий