Марий Эл Республикым вуйлатыше пеленысе Добровольчествым (волонтёрствым) вияҥдыме шотышто советын заседанийже эртен. Тудым правительстве председательын икымше алмаштышыжын пашажым шуктышо Михаил Васютин вӱден.
Российыште волонтёрство ден добровольчестве илышын йодмашыжым жапым шуйкалыде шукташ полшышо ик эн кӱлешан йогынлан шотлалтыт. Таче Марий Элыште лу тӱжем дене волонтёр тӱрлӧ аланыште – озадыме сурт янлыклан полшымо гыч тӱҥалын медицине ден культур марте – тырша. Волонтёрствым кугыжанышат вияҥдаш полша – тиде «Образований» национальный проектын «Социальный чолгалык» федеральный проектшын задачыже-влак кокла гыч иктыже. Республикыштына добровольчествылан полшымо ресурс рӱдер-влак почылтыт, нуно волонтёр-шамычын пашаштым виктарат. Заседанийыште тиде сферын пашажым иктешленыт.
«Волонтёр-медик-влак» всероссийский мер толкынын Марий регионысо пӧлкажын пашаже да полышыж нерген республикын тазалык аралтыш министржын алмаштышыже Юлиана Зейтулаева каласкален. Тудо волонтёр-медик-шамычын пашаштым поснак коронавирусын пандемийже пагытыште кӱкшын аклен, молан манаш гын нуно врач-влак дене пырля, лӱдде, шкем чаманыде, пашам ыштеныт, кызыт «Таза республик» акцийыште чолган полшат.
Марий Элысе ола округлаште да муниципальный районлаште добровольчествым вияҥдыме паша дене Козьмодемьянск ола администрацийым вуйлатыше Михаил Козлов, Йошкар-Ола администрацийым вуйлатыше Евгений Маслов да Волжск ола администрацийым вуйлатыше Рафис Шагвалеев палдареныт. Нине олалаште почмо Волонтёр рӱдер-влак поро кумылан эн шуко еҥым ушеныт. Нуныжо у коронавирус инфекцийын озаланымыж пагытыштат поснак илалше ден инвалид-шамычлан кочкыш ден моло сатум мӧҥгышкыштак намиен пуымо, илыме-коммунал услугылан тӱлымӧ шотышто кугу пашам шуктеныт, кызытат, Россий Вооруженный вийын Украиныште спецоперацийым эртарымыж жапыште, контракт дене служитлыше, мобилизоватлыме воин-влаклан, тыгак нунын ешыштлан тӱрлӧ семын полшат. Тыгодымак шарнымаш, спорт, экологий, кумдыкым тӱзатыме паша да тулеч моло дене кылдалтше тӱрлӧ мероприятийыште участвоватлат, ментальный ситыдымаш дене орланыше йоча-шамычлан кызытсе илышлан келыштаралташ полшат, шкет илалше да инвалид-влак нергенат огыт мондо. Шагал огыл поро пашам ший волонтёр-шамыч шуктат да тидын дене Марий Элнам чумыр Юл кундем федеральный округышто чапландарат.
Кучем вуйлатыше-влак шӱм-чон йӱлен тыршыше волонтёр-шамычын пашаштым кӱкшын аклат да нуным тӱрлӧ семын кумылаҥдат. Е.Масловын мутшо почеш, мутлан, студент-влак Йошкар-Олан мэржын стипендийжым налын кертыт. Тыгак абитуриент-шамычлан тунемаш пурымышт годым волонтёр книжкашт почеш баллым ешарат. Шушаш ийыште ший волонтёр-влакымат посна грант дене кумылаҥдат.
Кумшо докладчик молодёжный политике, спорт да туризм министрын пашажым шуктышо Лидия Батюкован мутшо почеш, республикыштына «Образований» национальный проектын «Социальный чолгалык» федеральный проектшын кышкарыштыже палемдыме чыла показательым эреак шуктен толмо. Чыла рӱдерым жапыштыже почмо, тушко волонтёр-влакымат ситышын ушымо, сандене кеч-могай пашамат тачак тӱҥалаш ямде улыт. Нуно тӱрлӧ акцийыште участвоватлат, тунемыт, шкешт да пашашт дене палдарат.
– Волонтёр-влакым Марий Элым вуйлатышын, Йошкар-Олан мэржын веле огыл, муниципальный образованийлам вуйлатыше-шамычынат грантышт дене куандарыме шуэш ыле, сандене тидлан 20, 30 але 50 тӱжем теҥгем муын ойыраш темлем, – манын Л.Батюкова. – Таче военный спецоперацийыш мобилизоватлыме-влакланат полшыман, ешыштланат эҥертыш лийман. Кызыт нунын дене социальный службын органже-влак пашам ыштат, социальный паспортлам почыт. Но нине еш-шамыч дене айдеме семын ваш умылен мутланымым нимо огеш вашталте. Илалше еҥым але изи йочам шочмо кечышт дене саламлыме але авалан иктаж-кушко миен толаш кӱлмӧ годым икшывым ик-кок шагат ончымо гай механизм республикыштына эше уке, но пурташ кӱлеш, очыни. Социальный пашаеҥ-влак чыла вере огыт шу, сандене тиде пашашке волонтёр-шамычым ушаш кӱлеш. Ме шуко мом ыштена, но у йодмаш-влак лектынак шогат.
Волонтёр-влакым рӱдерлашке кумылаҥден кондымо да добровольческий пашам шуктымо радам дене «Самырык-влакын полатышт» кугыжаныш бюджет тӧнеж директорын алмаштышыже Лариса Лоскутова палдарен. Ты шотышто шуко йодышым ДОБРО.РФ платформышто муаш лиеш.
– Поро шӱм-чонан еҥ-влакын кумылыштым шотыш налаш, полшашышт йӧным ышташ, тыгак результатыштлан куанаш проект ден грант-влакым темлаш кӱлеш. Республикыштына кӱлешанлан шотлалтше ик мероприятият волонтёр-влакын полышышт деч посна огеш эрте. Амал дене пайдаланен, исполнительный кучем орган, профильный министерстве-влакын еҥыштлан волонтёр толкынлан организаций, методике да моло велым полшымыштлан тауштем. Регионыштына волонтёр паша сайын кая, тудым умбакыжат вияҥдаш йӧным кычалаш тӱҥалына, – заседанийым мучашлен Михаил Васютин.
М.ИВАНОВА
Авторын фотожо
